08.11.2011, 16:02 Кои се голите украински протестантки?
Топлес-протестите се познати ширум Европа, бидејќи активистките на „Фемен“ постојат уште од 2008 година. Столбот на движењето го сочинуваат студентки меѓу 18 и 20 години.
Откако за првпат се појавија во Киев, пред три години, активистките на женското движење „Фемен“, познати по протестите во топлес, не се стегаа во борбата за женски права своите облини да му ги покажат на целиот свет. Нивната радикална борба го достигна врвот, кога во неделата Александра Шевченко разголена прошета пред базиликата на Свети Петар, во Ватикан.
Облечена во провокативна, проѕирна црна блуза, Александра се појави по обраќањето на папата Бенедикт Шеснаесетти на верниците. И додека поголемиот број собрани ги влечеа своите деца на страна, покривајќи им ги очите со раце, имаше и пријатно изненадени припадници на машката популација, кои гестот на Александра го поздравија со мавтање.
Во рок од неколку минути се појави италијанската полиција и ги приведе Александра и нејзините две соработнички.
Тоа не е првпат активистките на „Фемен“ да се најдат на мета на полицијата, бидејќи во текот на многубројните протести во топлес биле приведувани поради „нарушување на ја��ниот ред“.
Минатата година, на 27 октомври, беа уапсени шест активистки, кога полуголи и со провокативни натписи на плакатите пред споменикот на Ленин во Киев се спротивставија на влијанието на Русија врз украинската политика.
Топлес - протестите наголемо се познати ширум Европа, бидејќи активистките на „Фемен“ постојат уште од 2008 година. Столбот на движењето го сочинуваат студентки меѓу 18 и 20 години, а една од најстарите членки е токму основачката Ана Хустол, која има 28 години. Лидерката Хустол тогаш изјавила дека „планираат уште протести“.
- Ние сме мала армија од 300 студентки и сакаме да го свртиме вниманието на јавноста, на правата на украинските жени, но и на другите општествени проблеми. Соблекувањето беше начин да го свртиме вниманието на нашите ставови. Телото е се' што имаме и не се срамиме од тоа - раскажала Ана. Таа објаснила дека движењето го финансираат бројни деловни луѓе и локални бизнисмени, кои ги поддржуваат.
Организацијата стекна светска слава, благодарение на топлес- протестите против сексизмот, како и другите облици на националните и општествени болести. Целта на организацијата е „развивање лидерство, интелектуални и морални квалитети кај младите жени, како и „да се изгради подобар имиџ на Украина, земја со големи можности за жените.“
Од движењето најавиле дека ќе се обидат како политичка партија и да го најдат своето место во парламентот. Мажите во Украина нивните акции главно ги оценуваат како „бесмислени“ и „невкусни“, додека повеќето жени се импресионирани, а илјадници од нив отворено им даваат поддршка преку „Фејсбук“ и другите социјални мрежи. (Ј.П.)
|
