07.11.2011, 12:08 Попоски: Досега немало прифатлив предлог за името
Македонија не може да прифати меѓународна арбитража за решавање на спорот со Грција за името, бидејќи станува збор за суштинско прашање кое задира во клучните параметри на секое демократско општество.
Фактот што на демократски начин сме се определиле за името на државата, не може да има разрешница според истата методологија како по примерот на словенечко – хрватскиот спор за границата.
Тоа го истакнува во интервју за Радио Слободна Европа министерот за надворешни работи Никола Попоски.
Тој потврдува дека под покровителство на Обединетите Нации, Македонија и Грција преговараат само за името, но додава дека ако се следат изјавите на грчката страна може да се заклучи оти проблемот се проширува и на идентитетски прашања.
Според Попоски, моментно мотивираноста на Грција да преговара за проблемот со името не е на посакуваното ниво.
Шефот на македонската дипломатија оценува дека од сите досега понудени решенија за проблемот со името, нема такво што би било прифатливо за македонските граѓани, за да може да биде ставено на референдум.
- Ниедно решение не е прифатливо доколку Македонија нема можност да ги затвори двете клучни поглавја - членството во НАТО и во Европската Унија, истакнува министерот Попоски во интервју за Радио Слободна Европа.
|
