04.11.2011, 15:27 Маковеј: Македонија подобра во борбата со корупцијата од некои земји од ЕУ
Европратеничката Моника Маковеј е задоволна од заедничката декларација на Мешовитиот парламентарен комитет Македонија - ЕУ.
- Тоа покажува дека работевме заедно и оти сме способни да најдеме комопромиси за бенефитот на Македонија. Среќна сум со заклученото во декларацијата, изјави Маковеј по денешната прес-конференција во Собранието на Република Македонија.
Таа смета дека Македонија треба да ги почне преговорите со Европската унија што секогаш го истакнувала и во нејзините јавни настапи во Европскиот парламент.
- Јасно е дека ЕК во изминатите три години го забележа напредокот на земјата и препорача почеток на преговори, но тоа не се случи поради грчкото лоби. Сите европски земји со исклучок на Грција ја признаваат Македонија под нејзиното уставно име и затоа ми е тешко да разберам зошто грчкото лоби го прави тоа. Сепак, тоа е единствената причина зошто на Македонија не и е даден датум за почеток на преговорите со ЕУ, рече Маковеј.
Според неа, време е да се повика Грција да ги почитува договорите што ги има потпишано и обврските што произлегуваат од нив.
- Можам да ја разберам фрустрираноста на луѓето од Македонија кои напорно работат со години и не добиваат датум за почеток на преговорите, но сметам дека едниствениот начин да го направат тоа е да продолжат со напорната работа зошто тоа го прават пред се за бенефитите на земјата и на народот, а не за ЕК, ЕУ или некои други институции, изјави романската европратеничка.
Маковеј, која беше советник на македонската Влада за борба против корупцијата, вели дека секако оти има проблеми во борбата со корупцијата, но ги има и во Романија и во други земји.
- Го поздравам напредокот во однос на минатата година што го направивте на Листата за перцепција на корупцијата. Сега сте на 62. место заедно со Хрватска која ќе и се приклучи на ЕУ, а има и земји членки на Унијата кои се полошо рангирани од Македонија како што се Италија, Романија, Бугарија и Грција. Најглем проблем во корупцијата кај вас како и во други земји е финансирањето на кампањите на политичките партии, изјави Маковеј.
Смета дека нема потреба да се менува законот за тоа бидејќи е добар, туку прооблемот е во неговата имплементација. - Мора да се контролира и партиите или индивидуите кои го кршат мора да бидат санкционирани, вели таа.
Во врска со исполнувањето на критериумите за членство во ЕУ, посочува дека е важно за судскиот систем да се објавуваат сите пресуди и да се направи унификација на студиите за судии зашто судскиот систем мора да биде предвидлив, а судиите да носат исти пресуди, а не спротивини за слични случаи.
- Мора да ги дисциплинирате судиите. Имате целосно независно судство и обвинителство, но не гледам многу санкционирани судии или обвинители. Имаме исто искуство во Романија како посткомунистичка земја. Мора да направите нешто за да го исчистите судскиот систем, порача европратеничката Моника Маковеј.
|
