Роуд-шоуто во САД тргна од Детроит

Менаџерите на познати брендови од автомобилската индустрија слушнаа што нуди Владата, а и какво е искуството на инвеститорите што работат на македонскиот пазар

Соња Маџовска


Втората економската презентација на владина делегација во Соединетите Американски Држави, предводена од премиерот Никола Груевски, започна од Детроит.

Пред 60-ина компании од автомобилската индустрија бизнисмените од Детроит први ги слушнаа предностите за инвестирање во Македонија. Менаџерите на познати брендови од автомобилската индустрија ги слушнале и личните искуства од инвеститори што веќе работат на македонскиот пазар. „Детроит е град на автомобилската индустрија така што голем дел од нив беа претставници од овој сектор. Владиниот тим го даде максимумот, ја претставивме Македонија во вистинско светло, во реално светло. Ги истакнавме сите предности за инвестирање во Македонија“, изјави премиерот Груевски.

Свои видувања за македонската бизнис-клима изнесоа и првиот човек на канадскиот гигант „Нортел“ и основач на проектот „Македонија 2025“ Мајк Зафировски, но и претставници на компаниите присутни со свои инвестиции во Македонија „Кемет електроникс“, „Џонсон контролс“ и „Џонсон Мети“.

„Импресиониран сум од оваа конференција, петта во последните пет години, каде што нивото на софистицираност на нашите предлози значително се зголеми. Но, исто така, е добро да се види дека референците од ’Џонсон контролс‘ и ’Џонсон Мети‘ се подобрени, што ја прави Македонија поатрактивна за инвестирање“, истакна Зафировски.

Според премиерот Груевски, излагањата на менаџери како Зафировски кој е многу познат како успешен во бизнис-круговите во Америка, како и присуството на инвеститорите во Македонија влеваат дополнителна доверба и потврда за тоа што го нуди македонската Влада.

Сепак, општ заклучок на средбата во Детроит била дека моментно економската состојба во Европа не е позитивна, но според Зафировски тоа за Македонија може да биде можност да привлече инвеститори бидејќи е многу важно да се биде на локација што не нуди само ниски трошоци, туку и ги задоволува деловните потреби на компаниите.

Инаку, посетата на Детроит премиерот ја искористи и за договори кои ќе помогнат во македонскиот здравствен систем.

„Америка е држава која е најнапредна во полето на медицината во светот. Секое доаѓање на обука на наши лекари и медицински персонал во САД е придобивка за нив самите, но и за Македонија“, истакна премиерот Груевски. Според него, овие првични разговори треба да ги продолжи министерот за здравство, а напролет се надева дека ќе биде потпишан и договор за соработка со клиниката „Хенри Форд“, за да можеме таму да испраќаме наши лекари на обука, на неколку месеци или на една година.

Следната дестинација на владината делегација е Хјустон, таму исто така се очекува да се посети еден од најголемите медицински центри во Тексас, со иста намера да се издејствуваат обуки за нашите лекари и доаѓање на нивни лекари во Македонија. А потоа следуваат Лос Анџелес и Сиетл.

Инаку, пред само три месеца Владата исто така беше на десетдневно роуд-шоу во САД и во Канада. И тогаш владините претставници и бизнисмени посетија повеќе градови со цел да ги убедат странските компании дека Македонија е поволна бизнис-дестинација.