Саботни муабети

Аjнштаjне! Пукни!

Огнен Јанески

„Ха, ха, ха!“

Не сте можеле да имате поразлична реакција од оваа кога сте го прочитале огласот на Министерството за здравство, во кој, меѓу другото, се истакнува дека кандидатите за пројавување (што и да значи тоа!) интерес за да бидат членови на комисијата за сложени анализи мора да дадат сертификат од МЕНСА, со кој ќе докажат дека имаат коефициент на интелигенција од 140, па нагоре. И покрај тоа што современите психолози го отфрлаат овој коефициент за мерење интелигенција, зашто има и други важни фактори.

Се отвораат милион прашања и се даваат уште по толку одговори низ низата коментари кои го опседнаа социјалниот свет, а медиумите (како и секогаш), со задоцнета реакција, ја презедоа од него.

Неверојатно е колку суптилно, само преку еден оглас, може да се создава елитизам, кој ни е тотално непотребен во денешните услови, во кои се наоѓаме. Но, во општество, каде што дипломците веќе не се во мода, туку сега тоа се порамнува со средното образование, па за сметка на тоа, потребно е да имате, квантитативно, магистерски (мастер) студии, во најмала рака земено – елитизмот е очигледно крајно „пожелен“.

Во случајов, пишувам од аспект на човек кој, да речеме, би сакал да биде дел од таа комисија и за толку ситни пари како што се хонорарите на членовите, да си ги вреднувам, мозокот, искуството и образованието.

Ако ги разгледуваме критериумите според даденоста, првиот не го исполнувам за само 4 поени (оценето според матрица на МЕНСА). Впрочем, од мојата група тестирани имаше само едно девојче, кое со своите високи 178 поени би го исполнувала условот.

Вториот критериум не гледам потреба зошто воопшто и би го разгледувал, со оглед на тоа дека образованието сум го стекнувал на највисокорангираниот (според Шангајскиот универзитет „Џио Тонг“) универзитет во државава (УКИМ), кој не е ни меѓу првите 500 во светот! И плус, дополнителниот поткритериум е нелогичен! Барањето просек 8 од студент кој треба да има над 140 IQ нема допир со реалноста. Или, пак, можеби и има, зашто македонските универзитети немаат образовна политика за третирање студенти со висока или натпросечна интелигенција.

За третиот критериум е в ред. Сеопшти се! Впрочем – кому не му требаат новинари, па дури и за членови на комисија за сложени анализи во Министерство за здравство!? „Се разбираме? Хаос!“ – би искоментирала ултрапопуларната „Фејсбук“-икона - Покојна Милева на овие поткритериуми.

И секако - четвртиот, кој бара да познавате два странски јазика, е оправдан за младите генерации, но, се прашувам дали потврдата од нечие маалско училиште за странски јазици (од времето кога немаше странски програми кај нас) ќе биде прифатена. Впрочем, прашањето е – колкумина кај нас можат да се пофалат со сертификати за англиски (ТОЕФЛ) и за шпански јазик (Институто Сервантес) од светски ранг? За останатите јазици немам информации кои се нивните институционални пандани во глобални рамки.

Дискриминаторскиот однос со објавувањето ваков оглас е поразувачки. Автоматски на луѓето им поставувате граници кои не можат да ги достигнат, а со тоа ги демотивирате, зашто според МЕНСА – само 1-2 процента во светот се со коефициент над 135! А кој од нив би сакал да решава сложени анализи за сума од 50 до 90 евра? Понижувачки е и за лицето кое реално може да биде дел од комисијата!

Конечно, за инает на Ајнштајн, на министерот му го предлагам следново – отсега, при огласи да се бараат и историјат на прва кашлица, брис од исцедок од нос, отпечаток за дустабан-стапало, пубично влакно од прв коитус по можност, но и семејна фотографија до осмо колено. Сето ова да го потврдат институции од Алжир, Кореја или која било држава што завршува на –стан (на пример, Туркменистан).