Интервју: Гудрун Ш��ајнакер - ЕУ не затвора очи околу Македонија

Со оглед на контрадикторните информации за актуелниот спор меѓу ВМРО-ДПМНЕ и СДСМ, тешко ми е да оценам дали една од двете конфликтни страни е повеќе или помалку одговорна, вели амбасадорката

Слободанка Јовановска


Празниците ги поминавте во Македонија и бевте сведок на драматичните случувања во pарламентот. Да ја повторам дилемата на Карл Билт - има ли место во ЕУ за држави како нашата? Може ли да се простиме од препораката за преговори?

Случувањата од 24 декември сигурно не оставиле добар впечаток во странство. Ако не се решава конфликтот меѓу владината партија и опозицијата, тогаш тоа навистина би можело да влијае и врз шансите за македонскиот пристап во ЕУ. Меѓутоа, навистина се надевам дека двете конфликтни страни брзо ќе најдат решение.



Легитимен ли е парламент без опозиција и дали бојкотот што го најави таа на локалните избори е соодветен одговор за ситуацијава? Што ќе значат за земјата избори без опозиција?

Важечкото право, а пред се' Уставот определуваат за она што е легитимно во овој случај. Македонските правни експерти и експертите по уставно право можат и мораат да го оценат тоа. Би било навистина жално ако опозицијата не учествува на локалните избори во март. Граѓаните на една земја мора да добијат шанса да гласаат за сите партии во државата.



Од германска перспектива, иста ли е одговорноста на власта и на опозицијата околу политичката криза во земјата?

Со оглед на контрадикторните информации за актуелниот спор меѓу ВМРО-ДПМНЕ и СДСМ, тешко ми е да оценам дали една од двете конфликтни страни е повеќе или помалку одговорна. Сега и двете ја сносат одговорноста да најдат излез кој, според мене, може само да биде компромис.



Иако сите се согласуваат дека проблемите најдобро се решаваат низ дијалог, во Македонија него очигледно го нема. Како во вакви околности може да се дејствува со демократски сретства?

Не би се осмелила да оценам дали тука не постои дијалог или не може да има. Демократските правила им се познати на сите учесници. Сега е важно да пријдат едни кон други. Дијалог речиси не е можен кога секоја страна инсистира на своите максималистички позиции.



Според вас, што е тоа што ја дели Македонија? Морал ли е, или политички и интелектуален дефицит, тоа што ниту еден член на ВМРО-ДПМНЕ и ДУИ не изрази поинакво мислење и не се огради од тепањето на пратениците?

Не е моја задача да им препорачувам на владините партии како да се однесуваат при конфликт со партиите што се застапени во Собранието. Мене ми се познати само многу различните толкувања за она што се случи и се воздржувам од искажување на мислење. Тоа што се случи, се случи. Би поздравила доколку брзо се најде можност за повторен дијалог.



Како ја оценувате состојбата околу медиумите сега и дали остранувањето на новинарите од парламентот го делегитимизира дијалогот што се води со Владата?

Сигурно остави лош впечаток во странство тоа што медиумите мораа да ја напуштат салата за седници, а потоа и сите пратеници од една партија. Медиумите оправдано протестираа против тоа. Тоа покажа дека медиумите се во состојба да ги застапуваат своите интереси и истите да и ги пренесат на јавноста. Тоа е добро.



Дали затворањето на очите на Брисел пред проблемите во Македонија прати погрешна порака - дека и вака ќе дојдеме до препораката за преговори, бидејќи има одлука да се турне нашата држава?

Не разбирам што мислите кога велите „затварање очи“. Сигурно во Брисел не се затвораат очите пред разновидните проблеми овде во земјата. Препораката е мотивација, охрабрување за сите политички актери, како и за македонски граѓани да сторат се' во полза на пристапните преговори со ЕУ. Мислам дека на поимот „турне“ не му е местото овде.



Добро ли е за нашата евроинтеграција вицепремиерката Теута Арифи да ја напушти оваа функција среде дијалогот на виско ниво со ЕУ?

Мојот впечаток е дека г-ѓа Арифи е многу ценета од домашната јавност и во странство. Тоа се однесува и на Германија. Досега, таа со голема компетенција ги извршуваше своите сложени задачи. Секако дека би била загуба ако таа се посвети на други задачи. Меѓутоа, во политиката такви промени се нормални. Важно е наследникот или наследничката да п��одолжи со тоа што г-ѓа Арифи и нејзиниот тим сработиле досега и со истиот ангажман да се заложи за македонската евроинтеграција.



Ќе го зголемат ли скептицизмот во Берлин случувањата во парламентот?

Надлежните експерти во Сојузната влада внимателно ги следат случувањата во македонското Собрание. Конечно, ред е одговорните македонски политичари да преземат се' за да, врз основа на овие случувања, не се развие скептицизам во однос на вашата држава.



„Дојче Банк“ е една од двете банки во светот што најчесто стојат зад заемите на македонската Влада, кои беа причина за блокадата на буџетот.Нели ве плаши можноста да ви се повтори грчкото сценарио и овде?

Не ја коментирам политиката на „Дојче Банк“, која не е државна институција. Меѓутоа, се надевам и претпоставувам дека македонската Влада и претставниците на „Дојче Банк“ знаат што прават.



Каква новогодишна порака би им дале на македонските граѓани, кои очекуваат тешки денови во новата година?

Во своето новогодишно обраќање сојузната канцеларка Ангела Меркел им најави на граѓаните на Германија дека, со оглед на тековната европска финансиска криза, ќе претстојат тешки времиња. Но, истовремено таа апелираше до сите да не губат надеж, туку да ги прифатат тешкотиите како предизвици и заедно и солидарно да ги решат претстојните проблеми. Истото би сакала да му го препорачам и на македонскиот народ: луѓето и овде можат заедно и солидарно да ги надминат тешкотиите кои се реалност. Како што се вели: „Каде има желба, има и начин!“