Груевски распали пак: Бранко се плаши!

Премиерот смета дека лидерот на СДСМ, Бранко Црвенковски, се плаши од немањето поддршка од народот и ја повика опозицијата да се врати во парламентот и да разговара низ дијалог, а не со тепачки

Наум Котевски


Неколку часа по седницата на Извршниот комитет на ВМРО-ДПМНЕ на која беа одбиени сите барања на опозицијата, премиерот Груевски се огласи со остри напади врз Црвенковски и врз чекорите што ги презеде СДСМ по насилното исфрлање на нивните пратеници од дебатната сала во парламентот.

„ВМРО-ДПМНЕ се залага за одржување на редовните локални избори. Тие се наша законска обврска нешто што граѓаните го очекуваат и ние ќе бидеме целосно посветени, како и во минатото, да имаме фер, демократски и слободни локални избори на кои граѓаните ќе ја изразат својата слободна волја и ќе се определат за градоначалници во кои најмногу веруваат дека ќе придонесат за нивната општина“, рече Груевски.

Премиерот потсети дека уште на минатите избори пред година и пол рекол дека е подготвен за засилен мониторинг.

„Не само засилен, туку цел ОБСЕ нека дојде во Македонија и нека ги следи сите избирачки места и сите избирачки кутии постојано, плус уште колку сакаат време по завршувањето на гласањето. Ние сме подготвени да ги пречекаме, да им го овозможиме тоа, да ги поканиме, пред се', како држава.

Тој посочи оти власта е отворена за секакви нови идеи и барања од опозицијата во однос на избирачкиот список со цел да не им се даде повод на политичките противници дека нешто се прави нелегално.

„Иако веќе и претставниците на опозицијата пред камери објавија дека избирачките списоци се веќе прочистени, ние сме подготвени доколку дојде нова идеја во врска со нив целосно им стоиме на располагање. До сега ги прифативме сите нивни идеи вклучително и онаа неколку дена пред гласањето да не се дополнува Избирачкиот список со луѓе кои во тој период ќе извадат биометриски лични документи, иако тоа според мое длабоко убедување се коси со човековото право да гласа и да биде вклучен во Избирачкиот список. Сепак, за мир во куќа, што се вели, да не им даваме алиби на политичките противници дека нешто сакаме во последен момент да направиме нелегално и неетички така што и тоа барање го прифативме“, рече Груевски.

Во врска со нападите на опозицијата дека оваа власт по настаните во Собранието на 24 декември нема легитимитет да спроведе фер и демократски избори тој рече: „Легитимитет дава народот на избори. ВМРО-ДПМНЕ победи три пати на парламентарните избори организирани во изминатите шест години, а секој обид од СДСМ да се покаже нелегитимна оваа власт е само обид за манипулација со граѓаните, кој нема да им успее. Приказната дека 24 е некаков нов момент, во кој се губи легитимноста е само вадење на неуспешниот обид на Бранко Црвенковски и на неговите приврзаници да направат насилно узурпирање. Тие и сега се обидуваат низ хаос да ги изманипулираат граѓаните“, порача Груевски.

Според него, Црвенковски се плаши од немањето поддршка од народот и од крајот на неговата кариера.

„Посакуваме и повикуваме опозицијата да се врати во парламентот, таму каде што и' е местото, таму каде што треба да има дијалог и треба да се решаваат проблемите. Да седнеме и да разговараме да најдеме решение за сите проблеми, но низ дијалог, а не со тепачки, боксови, кршење чаши и не со тегнење и кинење на миркофоните, со закани, навреди, клевети, како што доликува во секоја демократска земја. Да се врати во парламентот и секако да си излезат на локалните избори, да не бегаат од локални избори. Јас на почетокот кажав дека овој обид што го направи Бранко Црвенковски практично е обид за избегнување негово лично соочување со нов неуспех на локалните избори, со нов пораз на СДСМ, негов личен пораз со кој тој лично потоа нема да знае што да прави“, изјави Груевски.

ВМРО-ДПМНЕ ги одби сите барања на СДСМ

Владејачката ВМРО-ДПМНЕ го одби барањето на опозицијата за предвремени парламентарни избори заедно со локалните во март и ги повика опозициските пратеници да се вратат во Собранието. Една недела откако опозицискиот СДСМ и неговите коалициски партнери ги изнесоа своите барања, како услов за решавање на политичката криза, владејачката партија се произнесе дека не го прифаќа барањето за формирање техничка влада, бидејќи „нема потреба од предвремени парламентарни избори, затоа што такви ��е одржаа пред една и пол година“. Тие ги повикаа социјалдемократите да се вратат во Собранието и да учествуваат во неговата работа.

Ваквите ставови партијата ги усогласуваше во саботата навечер кога се одржа седницата на Извршниот комитет на ВМРО-ДПМНЕ. Владејачката партија потсетува дека во земјава пред една и пол година се одржаа предвремени избори по барање на опозицијата. „Тие избори беа изведени во целосна фер и демократска атмосфера, што впрочем беше и потврдено од целата меѓународна заедница. Би сакале да укажеме дека Република Македонија во само шест години веќе три пати одржа парламентарни избори“, велат од ВМРО-ДПМНЕ. (Н.К)

СДСМ: Локалните избори стануваат бесмислени

Нема враќање во Собранието, кое по инцидентите на 24 декември не е место за нормален политички дијалог. Локалните избори во ваква ситуација немаат смисла и неопходно е тие да се одржат заедно со предвремените парламентарни избори.

Со овие оцени СДСМ експресно го отфрли повикот од владејачката ВМРО-ДПМНЕ да се врати во институционалните рамки на дејствување и низ дијалог во Собранието заеднички да се бараат решенија за сите предизвици на државата и политичкиот амбиент.

„Ниту едно соопштение не може да го избрише фактот дека ВМРО-ДПМНЕ, со настаните пред и на ’црниот понеделник’, свесно ја укина институционалната политичка дебата, го прекрши Уставот, законите, деловникот, процедурите и ја суспендираше парламентарната демократија “, велат од СДСМ.

Тие сметаат дека е наивно да се преправаат дека власт која на ваков начин ги злоупотребува институциите може или сака да организира слободни, фер и демократски избори. „Затоа, за да се избегне понатамошно продлабочување на политичката криза единствено решение е да се врати изгубениот легитимитет на институциите. Тоа не може да се случи само на локални, туку преку слободни и фер предвремени парламентарни избори“,

велат од СДСМ. (Н.К)