Опозицискиот марш собра повеќе десетици илјади луѓе

Граѓани, симпатизери, членови на опозициските партии беа дел од „Маршот на вистината“, кој почна пред платото на телевизија Сител, продолжи покрај Владата и Собранието, а заврши пред платото на МРТВ

Наум Котевски



Близу дваесет илјади граѓани, членови, симпатизери на опозицијата речиси два часа во саботата го блокираа центарот на македонската метропола, со цел, како што самите рекоа, да се обидат да го одблокираат патот на вистината, долго време заробен од лагата на медиумските центри под контрола на власта.

Протестниот „Марш за вистината“ почна пред платото на телевизија Сител, а продолжи пред Владата, Собранието и заврши пред јавниот сервис МРТВ. Пред објектот на јавниот сервис се обрати и лидерот на СДСМ, Бранко Црвенковски, со зборовите дека „црниот понеделник и случувањата од 24 декември во Собранието е најголемиот срам за Македонија“ и оти единствено решение за настаната криза се нови парламентарни избори.

„Велат, народот им дал мандат да владеат четири години. Да, народот ви даде мандат да владеете, но не ви даде мандат пратеници и новинари да тепате, устав и закон да кршите. На 24 декември ви го одзедовме и мандатот и легитимитетот. Единствено решение се нови парламентарни избори. Колку власта повеќе глуми толку повидливо станува лудилото. Сакам да им порачам дека нема заборавање и проштевање“, рече Црвенковски.

Новинарите на Сител тоа студено утро беа пречекани од огромен билборд поставен пред арената „Филип втори“ на кој беше прикажан уредникот Драган Павловиќ Латас, како платеник на власта и во друштво на Слободан Милошевиќ и премиерот Никола Груевски. Пред новинарите да го отстранат билбордот бившиот премиер и лидер на ВМРО Народна, Љупчо Георгиевски, рече дека во Македонија нема сериозна дебата ниту за економија, ниту за историја, ниту за политика.

„Ги имаме само нивните медиуми и секоја вечер ги повторуваат истите лаги“, рече Георгиевски, кој го повика уредникот Латас конечно да прифати дуел во кој тој ќе му постави три клучни прашања, кои во оваа прилика не сакаше да ги открие.

Според Георгиевски во негово време и во времето на Бранко Црвенковски владеела далеку подемократска атмосфера во светот на медиумите. „Постојано слушам прашања од типот како тоа јас и Црвенковски можеме сега да соработуваме, по низата навреди што сме ги упатиле еден кон друг. Па, тогаш и можеше да се навредуваме затоа што имавме можност да се судриме пред камери. Сега само слушаме навреди и лаги, а немаме можност да одговориме со аргументи“, додаде Георгиевски.

Присутните граѓани со овации го поздравија Георгиевски, но имаше и такви како, да речеме, архитектот Вангел Божиновски (познат по делото „Домот на мајка Тереза“, но и по јасните ставови дека барокот е длабоко вкоренет во традицијата на македонската архитектура), кои мирно си го пиеја утринското кафе и пушеа луле на терасата од хотелот „Конак“, недалеку од смрзнатото езерце во Градскиот парк.

Реката луѓе, која како што кажа опозицијата, претставува силен и јасен отпор против систематското газење на слободата на медиумите и говорот, продолжи покрај Владата и собранието, се' до МРТВ. Таму поранешниот генерален директор, Слободан Трајковски, рече дека морал да замине од телевизијата во 2010 година, па и со 100 евра казна на платата. Трајковски порача дека народот не се собрал пред МРТВ ниту да влегува внатре, ниту да се заканува, туку да укаже дека јавниот сервис мора да ја исправи својата уредувачка политика. Тој упати три пораки од пред ТВ куќата во која го помина целиот работен век.

„Новинарите, снимателите, монтажерите, не треба бидат послушници на режимот и треба да се ослободат, да не молчат и да не станат партиски војници кои ќе ги исполнуваат директивите на власта. Раководството на телевизијата послушно ја претвори наместо во јавен во партиски сервис, за кој плаќаат сите граѓани. Власта мора да ги тргне своите раце од јавниот сервис и да остави професионално и објективно да си ја врши својата работа“, рече Трајковски.

Новинарката Катерина Цаневска Арсовска кажа дека МРТВ нема газда во ликот на Бранко Црвенковски, ниту во Никола Груевски, ниту во Жерновски и Георгиевски, туку дека газда на МРТВ е народот и таа не треба да биде ничија партиска своина.