Уште 300.000 евра за пет нови споменици

Спомениците меѓу кои се и на Неџат Аголи и Јосиф Багери ќе се леат во италијанската леарница „Гуастини“

Деспина Трајковска



Сметката на Општина Центар за „Скопје 2014“ ќе се испразни за уште 300.000 евра. Толку пари ќе се потрошат за леење на нови пет споменици. Меѓу договорените за леење се и спомениците на Неџат Аголи и Јосиф Багери, кои се два од трите таканаречени рамковни споменици во владиниот проект. Останатите три се спомен-обележјата на Кузман Јосифовски-Питу, Христо Татарчев и на Павел Шатев, кои ќе ја чинат Општината повеќе од 210.000 евра. Леењето, пак, на спомениците на двајцата албански дејци ќе чини по околу 50.000 евра за еден.

Сите пет споменици ќе се леат во италијанската леарница „Гуастини“, со која Општина Центар пред нецел месец потпишала пет договори.

„Во тек е потпишување на договорите за леење со леарницата ‘Гуастини.‘ Рокот за поставување на спомен-обележјата е од шест до 18 месеци, по преземање на моделите“, кусо информираа вчера од Општина Центар, која одлуката за поставување на посочените споменици ја донесе во минатата година.

Согласно со одлуката на Советот на Центар, споменикот на Неџат Аголи, кој бил министер за здравство во македонската Влада од 1945 година, ќе стои речиси рамо до рамо со коњаникот на Гоце Делчев пред Камениот мост. Споменикот на Јосиф Багери, пак, е планирано да биде поставен на просторот пред новата зграда на Стариот театар. Инаку, овие се два од засега трите споменици на албански истакнати личности со чие поставување „Скопје 2014“ ќе добие мултиетнички карактер. Планирано е уште да се постави и споменик на албанскиот писател Пјетер Богдани за кого локација е резервирана во паркот „Жена-борец“.

Засега нема официјални информации со колкави ди��ензии ќе бидат спомениците и во каква положба. Единствено се знае дека ќе се леат во бронза.

Истото тоа се однесува и за спомениците на Павел Шатев, Кузман Јосифовски-Питу и за оној на Христо Татарчев. Се знаат само локациите на кои ќе бидат поставени. Советот на Општина Центар одлучи споменикот на Питу Гули да се наоѓа во близина на Споменикот на бранителите во паркот „Жена-борец“. Павел Шатев и Христо Татарчев, пак, ќе се исправат во близина на Портата „Македонија“, односно на аголот од подземниот паркинг на Градскиот трговски центар.