Изградба на гасоводот од идната година

Премиерот Груевски од Русија најави дека до крајот на 2012 ќе се потпишат и меморандумот и договорот за гасот да потече во Македонија

Во скоро време се очекува потпишување меморандум за соработка со руската компанија „Стројтрансгас“ , а до крајот на летото треба да биде потпишан нацрт-договорот за изградба на гасоводот во Македонија.

Ова вчера од Санкт Петербург го најави премиерот Никола Груевски по средбата со раководството на руската нафтена компанија „Гаспром“.

„Договорено е во следните недела-две, прво да се потпише меморандум за соработка, а потоа да го добиеме и нацрт-договорот за изградба на гасоводот во Македонија, односно инфраструктурата за носење гас во внатрешноста на државата“, изјави Груевски и додаде дека до крајот на годинава или во првиот квартал од следната година очекува да почне реализацијата на овој проект.

Според него, Македонија ќе биде регионален центар на „Лукоил“ од каде што ќе се покриваат Бугарија, Албанија и Косово.

„Тоа веројатно ќе го зголеми и бројот на вработени во седиштето на ’Лукоил’ во Македонија“, посочи вчера Груевски.

Македонскиот премиер во Санкт Петербург имаше средба со Вагит Алекперов, директор на руската компанија „Лукоил“, при што руската нафтена компанија ги претставила плановите да ја зголеми инвестицијата во Македонија.

За приклучувањето кон „Јужен тек“ беше разговарано на вчерашната средба со генералниот директор на „Гаспром“, Алексеј Милер. Било изразено задоволство од досегашната соработка и подготвеност за интензивирање на процесот за приклучување на Македонија во „Јужен тек“, кој ќе претставува еден од најзначајните гасоводни коридори во Европа. Милер информира дека „Гаспром“ има подготвено нацрт-договор за приклучување на Македонија кон овој гасовод. Тој во текот на следниот месец, преку руското Министерство за енергетика, и официјално ќе и' биде доставен на разгледување на нашата земја, со што почнуваат сите конкретни дејства околу овој проект.

Покрај средбата со раководството на „Гаспром“, владината делегација вчера имаше средба и со губернаторот на Ленинградската област со кого се разгледувале можностите за продлабочување на економската соработка меѓу Македонија и Ленинградската област, која е една од најзначајните во Русија.

Инаку, приклучувањето на Македонија во енергетскиот проект „Јужен тек“ и гасификација на земјава беа едни од клучните теми и на завчерашната средба меѓу премиерот Никола Груевски и претседателот на Руската Федерација, Владимир Путин.

„Добивме позитивна реакција за приклучување на Македонија во проектот ’Јужен тек’ како и за спроведување на проектот за гасната инфраструктура во земјава. Се надевам дека до крајот на оваа година ќе успееме да почнеме со проектот“, изјави премиерот Груевски.

На средбата стана збор и за другите компании кои инвестираат во Македонија, како што е „Протек груп“, компаниите кои имаат концесии за рудници и други.

„Поголем број инвеститори од Русија покажаа интерес да инвестираат во Македонија, која нуди одлични услови за бизнис, има одлична деловна клима и тој интерес ние сакаме да го преточиме во конкретни инвестиции“, истакна Груевски. (М.Т.)