Груевски: Ајде на локални избори со најзасилен мониторинг

Премиерот смета дека лидерот на СДСМ Бранко Црвенковски се плаши од немањето поддршка од народот и ја повика опозицијата да се врати во парламентот и да разговара низ дијалог, а не со тепачки

ВМРО-ДПМНЕ ќе оди на локални избори, оти тоа е и законска обврска. Премиерот Никола Груевски денеска се обиде да пресече откако најпрвин ВМРО-ДПМНЕ го одби барањето на опозицијата за предвремени парламентарни избори заедно со локалните во март, притоа повикувајќи ги опозициските пратеници да се вратат во Собранието, а п��тоа СДСМ категорично остана на ставот дека нема да оди само на локални избори и дека нема да се врати во Собранието.

Груевски тврди дека локалните избори ќе бидат слободни, фер и демократски, а, како што додаде, подготвен е и на засилен мониторинг.

„ВМРО-ДПМНЕ се залага за одржување на редовните локални избори. Тие се наша законска обврска нешто што граѓаните го очекуваат и ние ќе бидеме целосно посветени, како и во минатото, да имаме фер, демократски и слободни локални избори на кои граѓаните ќе ја изразат својата слободна волја и ќе се определат за градоначалници во кои најмногу веруваат дека ќе придонесат за нивната општина“, рече Груевски по пуштањето во употреба на спортска сала во Средното училиште „Зеф Љуш Марку“ во општина Бутел.

Премиерот потсети дека уште на минатите избори пред година и пол рекол дека е подготвен за засилен мониторинг.

„Не само засилен, туку цел ОБСЕ нека дојде во Македонија и нека ги следи сите избирачки места и сите избирачки кутии постојано, плус уште колку сакаат време по завршувањето на гласањето. Ние сме подготвени да ги пречекаме, да им го овозможиме тоа, да ги поканиме, пред се', како држава. Така што од тој аспект немаме никакви дилеми дека незасилен, презасилен, туку најзасилен или не знам каков мониторинг нека дојде во Македонија ние имаме чиста намера, чиста идеја. Ние не сакаме да добиеме нешто што не заслужуваме, ние сакаме да овозможиме најдобрите според граѓаните да победат и да ги водат општините во Македонија“, вели Груевски.

Тој посочи оти власта е отворена за секакви нови идеи и барања од опозицијата во однос на избирачкиот список со цел да не им се даде повод на политичките противници дека нешто се прави нелегално.

„Иако веќе и претставниците на опозицијата пред камери објавија дека избирачките списоци се веќе прочистени, ние сме подготвени доколку дојде нова идеја во врска со нив целосно им стоиме на располагање. До сега ги прифативме сите нивни идеи вклучително и онаа неколку дена пред гласањето да не се дополнува Избирачкиот список со луѓе кои во тој период ќе извадат биометриски лични документи, иако тоа според мое длабоко убедување се коси со човековото право да гласа и да биде вклучен во Избирачкиот список. Сепак, за мир во куќа, што се вели, да не им даваме алиби на политичките противници дека нешто сакаме во последен момент да направиме нелегално и неетички така што и тоа барање го прифативме“, рече Груевски.

Во врска со нападите на опозицијата дека оваа власт по настаните во Собранието на 24 декември нема легитимитет да спроведе фер и демократски избори премиерот вели: „Легитимитет дава народот на избори. ВМРО-ДПМНЕ победи три пати на парламентарните избори организирани во изминатите шест години, а секој обид од СДСМ да се покаже нелегитимна оваа власт е само обид за манипулација со граѓаните, кој нема да им успее. Приказната дека 24 е некаков нов момент, во кој се губи легитимноста е само вадење на неуспешниот обид на Бранко Црвенковски и на неговите приврзаници да направат насилно узурпирање. Тие и сега се обидуваат низ хаос да ги изманипулираат граѓаните“, порача Груевски.

Според него, Црвенковски се плаши од немањето поддршка од народот и од крајот на неговата кариера.

„Посакуваме и повикуваме опозицијата да си се врати во парламентот, таму каде што и' е местото, таму каде што треба да има дијалог и треба да се решаваат проблемите. Да седнеме и да разговараме да најдеме решение за сите проблеми, но низ дијалог, а не со тепачки, боксови, кршење чаши и не со тегнење и кинење на миркофоните, со закани, навреди, клевети, како што доликува во секоја демократска земја. Да се врати во парламентот и секако да си излезат на локалните избори, да не бегаат од локални избори. Јас на почетокот кажав дека овој обид што го направи Бранко Црвенковски практично е обид за избегнување негово лично соочување со нов неуспех на локалните избори, со нов пораз на СДСМ, негов личен пораз со кој тој лично потоа нема да знае што да прави“, потенцира Груевски.