СДСМ не отстапува од јавно прокламираните цели

По соопштението на владеачката ВМРО-ДПМНЕ од опозицијата наведуваат дека понудиле разумен и остварлив план, за чија реализација се подготвени да постигнат политички договор

Нема враќање во Собранието, кое по инцидентите на 24 декември не е место за нормален политички дијалог. Локалните избори во ваква ситуација немаат смисла и неопходно е тие да се одржат заедно со предвремените парламентарни избори.

На овој начин СДСМ експресно го отфрли повикот од владејачката ВМРО-ДПМНЕ да се врати во институционалните рамки на дејствување и низ дијалог во Собранието заеднички да се бараат решени��а за сите предизвици на државата и политичкиот амбиент.

Опозицијата останува, како што вели, доследна на своите јавно прокламирани цели за враќање на демократијата во земјата, и од нив нема намера да отстапи. За остварување на тие цели, како што додава, понудила разумен и остварлив план, за чија реализација е подготвена да се постигне политички договор.

„Ниту едно соопштение не може да го избрише фактот дека ВМРО-ДПМНЕ, со настаните пред и на ’црниот понеделник’, свесно ја укина институционалната политичка дебата, го прекрши Уставот, законите, деловникот, процедурите и практично ја суспендираше парламентарната демократија. На ваков начин беше недвосмислено потврдено дека Собранието во овој состав не е повеќе место за нормален политички дијалог“, велат од СДСМ.

Според социјалдемократите, преседанот со насилното исфрлување на новинарите и опозициските пратеници од Собранието, неповратно и' го одзема легитимитетот на власта. Мандатот, според нив, добиен од граѓаните никому не дава право за политичко самоволие и диктат со злоупотреба на државните институции.

„Во ваква ситуација невозможно е да се очекува опозицијата, која беше брутално исфрлена, да се врати во Собранието кое во овој состав нема никаков легитимитет. Сметаме дека е штетно за државата оваа политичка криза создадена од власта да се игнорира“, потенцираат од СДСМ.

Социјалдемократите сметаат дека би било наивно да се преправаат дека власт која на ваков начин ги злоупотребува институциите може или сака да организира слободни, фер и демократски избори. Во вакви услови, според СДСМ, невозможно е да се одржат само локални избори, бидејќи тоа би значело легитимирање на однесувањето на власта, а сите оние кои би излегле на тие избори би станале соучесници во укинувањето на демократијата.

„Затоа, за да се избегне понатамошно продлабочување на политичката криза единствено решение е да се врати изгубениот легитимитет на институциите. Тоа не може да се случи само на локални, туку преку слободни и фер предвремени парламентарни избори. Уште еднаш сакаме да потенцираме, предвремените парламентарни избори не се само барање на опозицијата, туку неопходност наметната од политичката криза, како и единствено можно решение за истата“, велат од СДСМ.