Мислења

Јави се Груевски, Телеком те бара!

Ивор Мицковски

ВМРО-ДПМНЕ е на потег. Додека кај нас властите молчат, во Црна Гора за сличен скандал веќе е почната истрага

Тишината понекогаш е најгласна. Тишината од страна на ВМРО-ДПМНЕ околу корупциските скандали поврзани со Телекомот во најмала рака е симптоматична и зачудувачка. Не можам да разберам како крстоносците на борбата против криминалот и корупцијата се плашат да излезат во јавноста и да преземат конкретни мерки за расчистување на корупцискиот скандал со „Дојче телеком“ и „Маџар телеком“, поврзан со македонските политичари во периодот јуни 2005 – јули 2006 година. Дури и откако „Утрински“, како единствен медиум, повика на одговорност и откако опозицијата јасно го соопшти својот став и побара надлежните институции да профункционираат, ВМРО-ДПМНЕ настапи само со спинови, партиски препукувања и без никаква конкретна мерка за решавање на случајот.

Па, не разбирам, ако работите стојат како што спинуваат од ВМРО-ДПМНЕ, дека инволвирани се единствено функционери од СДСМ и ДУИ, тогаш кај се големите акции на Јанкулоска и на Обвинителството, каде е сликањето и апсењето пред камери, каде е Груевски да шутира пенали на отворен гол?

Очигледно, работите не се како што сака ВМРО-ДПМНЕ да ни ги претстави, па затоа единствено што ќе гледаме од нив е продавање магла. И внимавајте, откако СДСМ излезе со јасен став дека надлежните институции мораат да реагираат и дека одговорните мораат да одговараат пред законот без разлика на која партија и' припаѓаат, ВМРО-ДПМНЕ почна да објаснува дека постоел скандал, дека ова биле внатрешнопартиски борби. Па, од кога барањето да биде задоволена правдата, да се покрене вистинска истрага, да се изнесат пред законот одговорните е некаква внатрепартиска борба?!

Мене ми е јасно што прави ВМРО, откако СДСМ ги повика да реагираат – извикуваат: „Скандал, скандал“, не за нешто да решат, туку за нешто да сокријат. Не за нешто реално да побијат или да докажат, туку за да го оттргнат вниманието од суштината. Тие мислат дека ако излезеш со документ и потцрташ неколку членови што тебе ти одговараат дека си донел непобитен доказ, дека толку радикално си настапил (иако лажно), што си создал еден така замрсен случај кој никој не го разбира, па луѓето сами по себе ќе се уморат и ќе станат индиферентни пред фактите. Е, тој филм нема да го гледате!

ВМРО-ДПМНЕ сака народот да заборави дека Никола Груевски со личен потпис стои зад најштетната и најнепотребната приватизација во Македонија – Телекомот. Дел од неговиот кабинет тогаш беа Јанкулоска и Јанакиески. Сакаат да заборавиме дека за приватизацијата беше покрената кривична пријава против потписниците поради штетноста на договорот и овозможување имотна корист на приватна фирма на сметка на граѓаните. Така, најверојатно, почнува големиот влог на Груевски во Телекомот? Од тогаш сме сведоци на 11 години нелогичности со Телекомот, кои неизбежно упатуваат на премиерот Груевски. Како продолжува приказната?

Во 2006 година сметката на ВМРО-ДПМНЕ е блокирана. Но, на самиот почеток на изборната кампања за парламентарните избори 2006 година, на кои Груевски е кандидат на опозицијата, Телекомот приватизиран со негов потпис, решава да склучи договор со партиската фирма „Аналитико АИ“ во висина од 120.000 евра за маркетинг-услуги и за дистрибуција на СИМ-картички. Експертите за продажба на СИМ-картички се токму луѓето од актуелниот дрим-тим на Груевски. Ален Зекиров е газдата, Оливер Шамбевски бил директор, а вработени биле Јанкулоска, Протоѓер, Елизабета Канческа, Александар Бичиклиски. Прашањето кое никако да го одговорат од ВМРО-ДПМНЕ е како го добиле договорот во време на изборна кампања, дали е во четири очи и каде отишле парите од Телекомот, во нивната кампања или во нивните џебови? Неизбежно се поставува прашањето дали ваквата дарежливост од страна на Телекомот се должи на заслугите на Груевски за приватизацијата и дали неговиот влог во Телекомот е приказна која трае и до ден денес? Што, всушност, значи сево ова? Значи ли дека кога ВМРО-ДПМНЕ повикува на скандал во 2005 -2006 година, а не презема ништо, дека неверојатно им текнува на партискиот бизнис во „Аналитико“? Верувам дека истото се прашувале и американските истражни органи кога повикале дел од инволвираните лица на разговор?

Но, во нивната делумна анализа на скандалот кој самите го ограничуваат на периодот за кој се зборува дека продавале СИМ-картички, има дупка од 4 години, односно од почетокот на новиот милениум и приватизацијата на Телекомот. Ако американската тужба говори за период од 2005-2006 година, не треба да заборавиме дека лондонски „Економист“ прв пренесе како американските консултанти кои ги чешлале документите на „Маџар телеком“, констатирале неоправдани трошоци во висина од 24 милиони евра, за сомнителни договори, и тоа во периодот 2000-2006 година. Што значи, дека повторно се враќаме на штетната приватизацијата. И кога сме веќе кај приватизацијата, се поставува уште едно прашање. Еден месец пред Груевски да ја потпише приватизацијата, идниот сопственик на Телекомот во име на Елек Штрауб, на 15 декември 2000 година, со писмо потврдил дека во периодот 2001-2007 година планира во Македонија да инвестира 631 милион евра, нешто што го направило најдобар понудувач. Е, па, каде се преродбениците од 2007 година наваму, да се наредат со Груевски, да се сликаат и да ни дадат отчет колку од овие 631 милиони евра навистина се инвестирани во Македонија?

Приказната не завршува тука, изгледа дека матните зделки продолжуваат до денешен ден. Минатата година, во април, владиниот претставник во Телекомот, јавно потврди дека Владата на Груевски ја одобрува нелогичната трампа на три згради на Телекомот, плус доплата од 16,6 милиони евра, за една недоизградена карабина, сопственост на бизнисмен близок до власта. Власта никогаш не прозборе за овој случај, ниту пак објасни зошто трампата се случила и покрај очигледното отсуство на елементарна економска логика.

Поради сево ова, власта мора веднаш да престане со забошотување на случајот, да престане да спинува и да лаже и да се нафати со вистинска борба против корупцијата и криминалот.

Смешни се изјавите на Јанкулоска дека не може да се докаже или да се дознае кој учествувал во овој скандал бидејќи дел од осомничените се недостапни за македонските правосудни органи. Подеднакво се несериозни и се лажни изјавите на обвинителот дека американските докази не важеле во Македонија. ВМРО-ДПМНЕ има целосна и апсолутна контрола врз надлежните државни институции и нивното непостапување по одлуката на американските надлежни институции, е само дополнителна потврда дека правната држава е суспендирана, а Обвинителството е под контрола на фамилијата.

ВМРО-ДПМНЕ е на потег. Угледот на државата сериозно е загрозен. Додека кај нас властите молчат, во Црна Гора за сличен скандал веќе е почната истрага, а се најавува и парламентар��а истрага. Дури и инволвираноста на сестрата на Мило Ѓукановиќ не беше пречка за истрага. Втор голем проблем, покрај отсуството на независното судство, е и прашањето каков сигнал испраќа Владата до странските инвеститори и дали вака мисли да привлекува инвестиции. Впрочем, за Влада која може да се пофали со мизерни 200 милиони странски инвестиции годишно, одговорот е повеќе од јасен. И конечно, непостапувањето на властите и нивните обиди за забошотување на случајот ќе се рефлектираат врз оценките од Европската комисија. Но, не верувам дека тоа е нешто што го загрижува премиерот, кој веќе најави дека не очекува позитивен извештај и повторна препорака за почеток на преговори.

Но, да бидеме искрени, оваа политичка гарнитура не е на висина на задачата. Никогаш не работеле, ниту пак ќе работат за јавниот интерес. Никогаш не воделе, ниту пак ќе водат вистинска борба против корупцијата. Тоа е задача за некоја идна влада.

(Авторот е аналитичар од СДСМ)