Џемо Хаса и Адем Јашари се токмат за гостиварските улици

Министерот за локална самоуправа ја укина одлуката на Инспекторатот за локална самоуправа за стопирање на преименувањето на улиците во Гостивар

Татjана Поповска

Министерот за локална самоуправа, Невзат Бејта, и' овозможува на Општина Гостивар повторно да ја разгледа одлуката за преименување на повеќе улици со имињата на балистот Џемо Хаса, Адем Јашари, припадници на ОНА што загинале во конфликтот, 116. бригада (воена формација која во 2001 дејствувала во Гостиварско), УЧК, Хасан Пр��штина... Бејта соопшти вчера дека, по барање на Општината, ја поништил одлуката на директорот на Државниот инспекторат за локална самоуправа, Ванчо Шехтански, да се стопира преименувањето на улиците, бидејќи постапката не била законски спроведена.

„Листата на имиња што сака да ја спроведе Општината е усвоена уште во 2007 година. Тоа се угледни личности кои дале придонес за Гостивар и за Албанците. Со овие прашања не треба да се прави политика. Тие се реалност во ова општество и таквите промени се во интерес на сите граѓани“, изјави Бејта.

Тој побара од Општина Гостивар при повторената постапка да внимава на законската процедура и на Бадентеровиот принцип за гласање кој во оваа Општина, како доминантно албанска, важи за македонските советници. Македонскиот политички блок во септември, кога се разгледуваше ова прашање во Советот на Гостивар, се спротивстави на оваа идеја.

Директорот на Државниот инспекторат за локална самоуправа, Шехтански, тврди дека одлуката на Општина Гостивар е незаконска по четири основи. Тој најави дека ќе ја следи новата постапка и ќе реагира доколку не биде почитувана законската регулатива.

„За истата одлука на Општина Гостивар поведов иницијатива и пред Уставниот суд“, информира Шехтански.

Министерот Бејта нема дилеми дека листата на новите имиња за гостиварските улици ќе добие позитивно мислење од Владата.

„Ќе сторам се' Владата да ги одобри новите имиња. Ако треба, директно ќе се конфронтирам со Владата“, рече Бејта.