25.01.2012, 15:50 Ракометарите се надеваат на чудо
Македонскиот сон за полуфинале на ЕП во Србија и за настап на Олимпијадата би можел да стане јаве со победа над домаќинот вечерва и со посакувани резултати од другите два меча во групата
Од нашиот известувач
Роберт Димитриевски
БЕЛГРАД – „Ќе ни пуштат ли ’браќата Срби‘?“, е прашањето што ги скокотка македонските ракометни фанови пред вечерашниот дуел од 20,15 ч. во „Белградска арена“ против домаќинот на 10. Европско првенство, последен во првата група од главната фаза. Србија е веќе во полуфиналето, па многумина во Македонија би сакале да веруваат дека селекторот Веселин Вуковиќ ќе ги одмора своите клучни играчи. Освен за престиж, ним ништо не им значи овој меч, кој од друга страна за македонскиот машки ракомет има историски димензии. Влогот е огромен: полуфинале на јубилејниот евросамит во овој спорт и продолжување на сонот за настап на Олимписките игри во Лондон! Се разбира, ако на избраниците на Звонко Шундовски во третото и завршно коло им се насмее среќата буквално од уши до уши.
„Одвај чекам да ја видам таа пресметка на трибините – 10.000 македонски навивачи против 10.000 српски!“, вели капитенот Кирил Лазаров, кој пред заминувањето на ЕП имаше интересно размислување токму за вториот круг од шампионатот. „Со Данска, реално, шансите ни се мали, против Полска можеме да играме, а Србија сигурно ќе ја победиме! Можевме да го сториме тоа и во последниот контролен натпревар во Смедерево, но не сакавме да им ја расипеме атмосферата во тимот пред големото натпреварување на кое се домаќини“.
Вуковиќ, пак, по победата над Шведска од 24:21 не ја ни спомна Македонија.
„Имаме три дена за да се одмориме и да ги вратиме нашите повредени играчи во потребната физичка кондиција за полуфиналето в петок“, изјави српскиот селектор, (не)свесно прескокнувајќи го дуелот со јужниот сосед.
Толку за очекувањата во македонскиот табор и за тактизирањето во српскиот, а сега малку (повеќе) за тоа што би било кога би било. Македонија се' уште има шанси да се вмеша во борбата за медалите и да стигне барем до олимписките квалификации, но тие се во сферата на теоријата. Добитната комбинација е: Полска да ја победи Германија со разлика не поголема од два гола, потоа Шведска да ја совлада Данска и на крајот ние да бидеме подобри од Србите! Во тој случај ќе се создаде круг од три репрезентации на делба на второто место со по пет бода, при што се прави мини-табела и се решаваат меѓусебните дуели. Во тој случај Македонија е најдобра, бидејќи ја победи Полска со 27:25 и изгуби од Германија со 24:23, што значи би имала два бода и гол-разлика +1. Ги победат ли Германците со два гола разлика, Полјаците би биле втори на мини-табелата со два бода и со гол-количник нула, а „панцерите“ би завршиле трети со два бода и со гол-диференција минус еден!
„Шта је баби мило, тој јој се и снило“, вели една српска народна поговорка. Меѓутоа, ништо не е исклучено на ова налудничаво ЕП, на кое еден бод има вредност безмалку на три и каде што се случуваат најневеројатни пре��врти и уште почудесни резултати. Треба примери? Полска се врати од 9:20 на полувреме со Шведска и на крајот ремизираа 29:29 на стартот од вториот круг. Словенија го победи Исланд со два гола разлика, токму колку што требаше за елиминација на Норвешка од групата Д од првиот круг, во која сите три селекции завршија со по два бода. За македонските горчливи искуства во средбите со Шведска, со Германија и со Данска, пак, може да се напишат цели докторски дисертации...
Од друга страна, неколку факти го прават посакуваниот расплет за нас веројатен колку и можноста во Македонија да се откријат наоѓалишта на нафта, на дијаманти или на ураниум, како што духовито забележува еден посетител на интернет-сајтовите во својот коментар за наведените комбинации. И Германците се' уште немаат изборено олимписка виза, а за зачувување на шансите им е неопходна победа над Полска. Шведска, пак, го чека епилогот во групата без големи амбиции, со оглед на тоа дека нема шанси за полуфинале, во април во Гетеборг ќе биде домаќин на еден од трите квалификациски турнири за ОИ, а за скандинавското „на ти го – дај ми го“ има примери к��лку ти душа сака. Не само евровизиски.
Впрочем, еве што изјави шведскиот голман Јохан Сјестранд по завчерашниот пораз од Србија: „Отсега па натаму се подготвуваме за олимпискиот квалификациски турнир на наш терен“. Толку од мотивацијата за соседското дерби.
Што ќе излезе од сето ова ќе покажат резултатите од трите денешни меча во Белград. Програмата во „Белградска арена“ ја отвораат Полска и Германија од 16,15 ч., два часа подоцна ќе играат Данска и Шведска и на крајот Србија и Македонија. Пред последното коло во белградската група од вториот круг води Србија со седум бода, пред Германија со пет, Данска има четири, Македонија и Полска по три и Шведска два.
Миркуловски и Јоновски ќе играат
Иако во прв момент се чинеше дека Филип Миркуловски и Александар Јоноски го завршија својот настап на ЕП во Србија поради повредите добиени во средбата со Полска, дополнителните медицински анализи се позитивни. Кај Миркуловски, кој ја напушти салата со лонгета на десната рака и со првична дијагноза дека станува збор за скршеница или за напукнување на коската, се утврди дека има контузија на дланката и тој ќе настапи против Србија. На Јоноски, пак, му беше напукната носната коска во еден дуел во одбраната во првото полувреме, но од лекарскиот тим на „Аџибадем Систина“ ќе сторат се' и тој да игра во последниот меч од главната фаза.
Група 1
1. Србија 4 3 1 0 91:82 7
2. Германија 4 2 1 1 100:96 5
3. Данска 4 2 0 2 107:109 4
4. Македонија 4 1 1 2 108:108 3
5. Полска 4 1 1 2 99:104 3
6. Шведска 4 0 2 2 100:108 2
Денеска играат: Полска - Германија (16.15 ч.), Данска - Шведска (18.15 ч.), Србија - Македонија (20.15 ч.).
|
