Чешките ракометари „изгореа“ во натпреварот со Македонија



Најголем дел од коментарите во чешките весмници се дека македонскиот противник заслужено победи и доби шанса и за учество во Олимпијските игри во Лондон

Крај на надежта за голем успех на чешката ракометна репрезентација, Чесите изгореа со Македонија и заврши нивниот сон на Европското првенство во ракомет.

Ова се дел од насловите на денешните чешки весници по синоќешната победа на македонската ракометна репрезентација, врз екипата на Чешка, со резултат 27:21, во клучниот натпревар на Европскиот шампионат во Србија.

Најголем дел од коментарите се дека македонскиот противник заслужено победи и доби шанса и за учество во Олимпијските игри во Лондон.

- Сакам да им честитам на противниците и мислам дека заради нивните три резултати во групата заслужено одат понатаму. Ние не успеавме и тоа е голема трагедија за оваа генерација ракометари, рече селекторот на чешката репрезентација, Мартин Липтак, кој пред почетокот на Европското ракометно првенство ја прогласи Македонија за аутсајдер. Тој додаде дека чешката репрезентација војувала сама со себе и затоа изгубиле.

- Тоа беше огромно разочарување, но мораме да признаеме дека противникот беше подобар, Македонците ја заслужија победата, изјави 38- годишниот чешки ракометар, Јан Филип, кому ова му беше последен натпревар во кариерата.

Чесите не ги штедат пофалбите за македонската публика, која во салата „пеколно ја вжештила атмосферата“, а комплименти им упатија и на македонските репрезентативци, Кире Лазаров, кого го нарекуваат македонски снајпер и Стевче Алушевски.

- Тој е многу добар, класичен стрелец, кој во сите натпревари дава голови, вели чешкиот голман Петр Штохл за Лазаров.

Чесите не штедат комплименти за македонските ракометари, кои велат оти на „Штохл треба да му се заблагодарат што разгорениот матадор Алушевски уште веднаш во второто полувреме дефинитивно не ги скршил со повеќе голови.