(ФОТО) Финале со парискиот шарм на „М Кутур“ од Мила Кадриу



Следејќи ги светските тенденции во она што се нарекува модно шоу, идејата на Мила Кадриу е да се пренесе атмосферата на париските кафулиња од 20 години на минатиот век

По двенеделниот „Моден викенд Скопје“ за сезоната пролет-лето 2013 се чини дека и најгорливите модни зависници ги користеа резервите на кондиција за да ги проследат сите случувања на овој моден настан. Сега веќе можат да здивнат, барем до сезоната есен-зима и да ги користат придобивките од изминатиот „Моден викенд“ за своја пролетно-летна модна промоција.

Финалето на долгометражното модно живеење во Скопје се случи вчера во МОБ, со ревијата на Мила Кадриу, т.е. новата колекција на нејзиниот бренд „М Кутур“.

Париз, 20-тите години на 20 век. Зародок на сето она што денес го доживуваме како авангарда...

Кабареа, кафулиња, целиот уметнички свет на едно место. Лулка на модата. Периодот сам по себе дише со еден ненаметлив луксуз, што е доволно за вечна модна инспирација, а сосема конкретна идеја за колекцијата на „М Кутур“ за оваа сезона.

Следејќи ги светските тенденции во она што се нарекува модно шоу, идејата на Мила Кадриу е да се пренесе атмосферата на париските кафулиња и посетителите да имаат моќност да се почувствуваат како дел од одбраното авангардно друштво.

Настанот е „outdoor inspired“, што значи дека колекцијата се обидува да го репродуцира чувството да се биде на париските улици во 20 години, во комфорот на затворениот простор. (Ј.П.)