Интервју - СДСМ си дава автоголови

„Нервозата која се создаде кај социјалдемократите е поради математиките дека ’Сојузот за иднината‘ ќе им донесе дополнителни 70.000 гласа, но јас проценувам дека реалната вредност на ВМРО-НП и на ЛДП не е поголема од 20.000 гласа“, смета поранешниот претседател на СДСМ, Владо Бучковски

Татјана Поповска

Деновиве сте на удар на СДСМ, како ги доживувате нападите од Вашите поранешни блиски соработници?

Морам да признаам дека не бев изненаден, затоа што ако се следат настапите на СДСМ последнава недела и подготовките преку новинари блиски до нив, се гледа дека го подготвуваа теренот. Демек се' е по тамам во опозицијата и во СДСМ само да не работат кујните, кои имаат лукративни мотиви за да му нанесат штета на СДСМ за да не стигне партијата до очекуваната победа. Се гледа дека ова е оркестриран, подготвуван напад. Не можам да проценам зошто СДСМ влегува во негативна кампања, кога условно речено, сите очекуваа по формирањето на „Сојузот за иднината“, да влезе во позитивна кампања и да им се приближи на неопределените. На овој начин сметам дека СДСМ си дава автогол. Последните два дена имам илјадници јавувања од познати, но и од непознати луѓе, кои се вџашени од начинот на кој опозицијата, на нецели три и пол месеци пред почнување на официјалната кампања за локалните избори, се занимаваат со мене и со уште неколкумина поранешни истакнати членови на СДСМ.

За тоа немам логично објаснување. Мислам дека имаат погрешна претстава за моите активности. Според настапите, кај секретарот на партијата Андреј Петров гледам лик кој изгледа уплашено. Дали тоа е од стравот што некој го создал дека независните кандидатури се под моја диригентска палка. Ако така мисли, јас не знам како поинаку да го уверам освен уште еднаш да демантирам дека тоа не е мојот стил на политичка битка. Ако правам нешто, правам транспарентно. Мојот став е јасен, јас не настапувам со независна кандидатура, ниту пак со независни листи.



Сепак, има малку поголема коинциденција на она што сега се случува со Вашите најави од пред околу една година, дека е можно во политиката да се вратите со независни изборни листи.

Јас уште пред две недели јавно соопштив дека не планирам да доставувам независни листи, бидејќи во моментов немам потреба на кој било начин да бидам алиби за евентуалниот пораз на СДСМ. Нервозата која се создаде кај нив веројатно е поради математиките кои не им излегуваат. Ако очекувањата беа дека со „Сојузот за иднината“ ќе дојдат дополнителни 70.000 гласови, сега и на најголемите оптимисти им е јасно дека не е така. Силата на овие политички партии, особено мислам на ВМРО-НП и на ЛДП сега и пред година и пол не е истата. Проценувам дека нивната реална максимална вредност не е повеќе од 20.000 гласови. Од друга страна, најавите на овие независните кандидатури и можноста да има такви уште повеќе, ќе го соочат СДСМ со реалните бројки дека оние кои имаат независни листи, а биле истакнати членови на СДСМ можат евентуално да одлеат повеќе гласови од овие 20.000 што ќе им ги донесе Сојузот. Затоа се обидуваат да ги дискредитираат независните кандидати.

Зошто мислите дека Михаел Младеновски од Центар и Виктор Цветковски од Куманово ќе земат повеќе гласови од ВМРО-НП и ЛДП?

Јас говорам генерално, а не само за нив. Според најавите, Димитар Бузлевски може да освои повеќе гласови и од ВМРО-ДПМНЕ и од СДСМ. Или Панчо Минов, кој стандардно освојува две и пол до три илјади гласови во Кавадарци. Виктор Цветковски во Куманово не можам да проценам каков резултат може да направи. Но, не исклучувам дека може да постигне одреден резултат имајќи предвид дека беше форсиран во изминатите четири години. Беше член на Извршниот одбор во „ресетираниот“ СДСМ и беше фаворит на Црвенковски. Мојот фаворит бил и останал актуелниот градоначалник на Куманово, Зоран Дамјановски.



Велите дека СДСМ преку ваквите напади подготвува терен за конгресот по локалните избори. Какви ќе бидат Вашите позиции на тој конгрес?

Сценариото за конгресот е едноставно. Ако СДСМ победи, нормално и очекувано ќе биде Црвенковски да бара шанса на предвремени парламентарни избори да го победи ВМРО-ДПМНЕ и Груевски и да си замине како победник. Тој сам дефинираше дека еден глас повеќе на листите за советници е победа, иако јас мислам дека не треба да ситничариме, бидејќи СДСМ ќе биде близу до победата и ако има некоја илјада глас помалку од ВМРО-ДПМНЕ. Но, ако СДСМ биде поразен недвосмислено, за очекување е СДСМ да избира нов претседател. Тогаш ќе дојдат до израз моите заложби, кои наидуваат на поддршка во членството идниот на претседател да го избираме на непосредни избори. Најдобро е при евентуален пораз, Црвенковски сам да се повлече. Тогаш ќе имаме чиста ситуација и ќе можат да се направат подготовки за СДСМ повторно да застане на здрави нозе. Факт е дека ќе има потрес. Искуството со Борис Тадиќ и неговата Демократска партија треба да ни биде пример. Никој не веруваше дека неговите најблиски соработници први ќе побараат оставка од него. Во СДСМ ова молчење, овој конформизам нема да трае вечно.



Кога СДСМ соопшти дека поднеле кривична пријава за случајот „Телеком“ Вас не Ве спомнаа. Вашето име и името на Димитар Бузлевски ги спомна ВМРО-ДПМНЕ?

Ова што сега го прави Андреј Петров, СДСМ јавно го правеше цел месец кога медиумите ја следеа разрешницата во САД за вонсудската спогодба што ја постигнаа „Т-мобиле“ и американската Комисија за хартии од вредност. Најмалку десетина брифинзи имаше во СДСМ, каде што и тогаш посочуваа еве ги Бучковски, Бузлевски, па и други имиња беа споменувани. Сега, очигледно, се испровоцирани од атмосферата која се создава. Оваа тензија и нервоза е резултат на високиот лимит за победа, што Црвенковски сам го спомена. Инаку, во Македонија нормално е да има независни листи.



Вие прв го повикавте Црвенковски да ја организира опозицијата по принципот на српски ДОС за да може да ја победи оваа владејачка гарнитура. Тој го спроведува тој проект, со исклучок на албанските партии, зошто сега го критикувате и тврдите дека не е добар?

Мислам дека не е доволно. Силата на овие четири партии што сега се приклучија, е различна во јуни 2011 година и во ноември 2012 година. Дополнително, тоа требаше да се направи уште пред изборите. Сега беше нужно. И тоа е прагматичен пристап на СДСМ, кој се обидува да го зголеми својот фонд на гласови. Прагматичен е пристапот и на вонпарламентарните опозициски партии, за кои е јасно дека ако не бидат дел од локалната власт, ќе се најдат пред политичка маргинализација. Тука мислам на ВМРО-НП и на ЛДП. Потоа Црвенковски никако не смееше да ја растури коалицијата со ДПА. Исто така сметам дека поради сопствената суета Црвенковски не успеа да го обедини СДСМ. Еве одбрал јас да му бидам опозиција во партијата, со кого ќе се пресметува и не сака да соработува. Зошто не ја формираше владата во сенка, што е проблемот? Очигледно проблем му е тоа што не сака да признае дека дел од раководството што сам го избираше нема поддршка во јавноста. Тоа е еден од сериозните проблеми што ги има СДСМ. За мене е несфатлива нивната стратегија. Во ситуација кога толку ретко имаме штрајк на лекарите, Андреј Петров како лекар по професија, место да се занимава со мене и да биде квазиобвинител, тој треба јасно и недвосмислено да ги поддржи лекарите. Тој води негативна кампања, а со неа може да направи само штета.



Потпретседателката на СДСМ и Ваша колешка од Правниот факултет, Ана Павловска-Данева, во последната колумна ве обвинува дека иако сте свесен за режимот што го спроведува ВМРО-ДПМНЕ, не ги критикувате нив, туку само СДСМ.

Тоа е поразително за неа. СДСМ беше најмоќна кога имаше раководство со кое не се случуваше да има координација или средба, а сите да кимаат со глава на тоа што ќе го каже Црвенковски. Тоа беа златните времиња. Доаѓањето на Гордан Георгиев, Ана Павловска-Данева, Зоран Јовановски требаше да донесе нов квалитет, но тоа не се случи. На Ана, очигледно, побитна и' е функцијата, а не гледа што се случува.



Можете ли да направите паралела на степенот на демократија во СДСМ и во ВМРО-ДПМНЕ?

СДСМ мора да се разликува од ВМРО-ДПМНЕ. Партијата на Груевски функционира и ќе функционира додека е на власт и затоа додека победуваш никој не прашува за начините како доаѓаш до победата. ВМРО-ДПМНЕ функционира според класичен демократски централизам. СДСМ на голема врата го враќа тој централизам. Нема ни „Д“ од демократија која би стимулирала различно мислење. Нивната логика е ако не мислиш исто со нив, тогаш мора да си платен, уценет или врбуван од ВМРО-ДПМНЕ. Тука СДСМ ја пропушти можноста да покаже дека е различен од ВМРО-ДПМНЕ. За прашањето за името, мултиетничкиот карактер СДСМ оди во чекор со нив, се труди да биде копија на ВМРО-ДПМНЕ. Неопределените не го наоѓаат тоа кај опозицијата, што треба да биде алтернатива на власта.

Што мислите за кандидатите за градоначалници на СДСМ?

За мнозинството, односно за оние што ги познавам, имам позитивно мислење.



Вие сте во општина Карпош. За кого ќе гласате на локалните избори?

Ќе гласам за Стевче Јакимовски. Секогаш гласам за кандидатите од мојата матична партија.


А ако има независен кандидат и во таа Општина?

Ќе гласам за Јакимовски.

Кога сме кај „Телеком“, се чувствувате ли како тогашен премиер одговорен за овој случај?

Додека не заврши судскиот процес кој се води против поранешниот директор на Агенција за електронски комуникации Трпковски, не можам многу да зборувам. Во тој процес јас сум сведок. За да не го загрозам сведочењето само ќе посочам неколку работи. Прво треба да се следи однесувањето на владите на СДСМ кон „Маџар телеком“ и зошто во 2002, 2003, 2004 година не беше исплатена дивиденда. Бидејќи законот за електронски комуникации кој беше неопходен да се либерализира пазарот, е донесен на втората владина седница кога јас станав премиер. Реализација на тој клучен елемент за либерализација на пазарот се случува во парламентот. Треба да се видат однесувањата на владејачкото мнозинство, но и на ВМРО-ДПМНЕ тогаш кога пратеник беше Никола Груевски, за да се дојде до вистинската претстава за тоа дали воопшто е можно да биде извршена таква, условно речено, голема операција каде што би биле инволвирани стотина луѓе и досега никој ништо да не зуцне.



Но, „Дојче телеком“ исплати отштета, значи некаков заговор е очигледно дека има?

Таму е сосема друга приказната зошто „Дојче телеком“ исплати, а зошто „Т-мобиле“ дојде во судир со американската држава. Тоа е бизнис во телекомуникациите. Прозаична е приказната дека проблемот на релациите на „Т-мобиле“ со американската држава биле поради случувањата во Македонија или Црна Гора. Тој судир е многу поширок, а во конкретен случај дали чувствувам дека работите можеле да бидат поинакви во 2005 година, мислам дека одлично го менаџиравме процесот кој беше наследен, односно привилегиите што „Маџар телеком“ ги добил со договорот од 2001 година беа наследени.