Реплики

Пресметка – за што?!

Соња Крамарска

Што го предизвика Црвенковски кој некогаш важеше за добар политички стратег на таква ризична игра во која самиот тој може многу да изгуби?

Платеник на ВМРО-ДПМНЕ, душман на СДСМ, криминалец, поддржувач на Груевски, срам за партијата – се само дел од епитетите со кои деновиве СДСМ го почести официјално и неофицијално својот некогашен лидер и премиер на земјата Владо Бучковски. За Бучковски можете да слушнете се' најлошо во највисоките структури на СДСМ. Тој е моментно црниот ѓавол со кој треба да се справи СДСМ пред да влезе во изборна пресметка со политичкиот ривал ВМРО-ДПМНЕ.

Како резултат на тоа СДСМ и натаму се дели наместо да ги собира своите редови пред локалните избори во март. Бучковски се' уште има приврзаници во СДСМ а и оние кои не му се приврзани, не се согласуваат со таквите методи на сатанизирање на довчерашниот политички ас на левицата. Особено не сега, откако Црвенковски на сензационален начин си подаде рака со Љупчо Георгиевски кој сепак му беше далеку поголем непријател нему и на СДСМ отколку што е тоа Бучковски.

Што го предизвика Црвенковски кој некогаш важеше за добар политички стратег на таква ризична игра во која самиот тој може многу да изгуби?

Мислам дека социјалдемократите големата офанзива против Бучковски ја темелат на неколку погрешни процени. Првата е дека Бучковски ќе се вклучи во локалните избори, што е сепак варијанта со многу мали изгледи да се случи. Втората е дека тој ќе направи политичка партија која може да ја загрози СДСМ, што е исто така речиси невозможно. Сите партии ��то произлегоа од двете најголеми партии ВМРО-ДПМНЕ и СДСМ доживеаја порано или подоцна пораз. Бучковски тоа добро го знае. Третата погрешна процена е дека Бучковски со помош на ВМРО-ДПМНЕ ќе им обезбеди гласови на неколкуте незадоволници од СДСМ кои најавуваат независни кандидатски листи на претстојните локални избори.

Сите овие прогнози на СДСМ се помалку или повеќе далеку од реалноста што покажува дека најголемата опозициска партија и единствена алтернатива на сегашната Влада, има проблем со проценка на својата сопствена позиција на политичкиот пазар и антиципирањето на идните случувања на политичкиот терен. Тоа резултира со хистеричен и непримерен напад на Бучковски со што до јавноста се праќа порака дека партискиот врв нема капацитет да прима критики од своите редови па дури и тие да доаѓаат од Бучковски кој е формално одамна заминат од „Бихаќка“.

Голема вознемиреност деновиве е присутна во сдсмовските редови. Иако на Бучковски таму се гледа како на поранешна политичка фигура која повеќе не е со нив, не ги одобруваат методите со кои се служи актуелното раководство за негово оцрнување. Особено начинот на која се води медиумска кампања против него во медиуми што се блиски до партиското раководство. Хајката што се води против Бучковски се споредува со хајката што ВМРО-ДПМНЕ ја води против Црвенковски. Таквото изедначување на политичките методи не ја става СДСМ во поволна позиција во однос на политичкиот противник кон кого упатуваат обвинувања за брутална пресметка со неистомислениците.

На која друга анализа се потпираат социјалдемократите за вирусното дејство што врз нивниот организам може да го има Бучковски? Според прилично сигурни информации тој нема истомисленици во партискиот врв, а поради судирите што ги имаше со претходната гарда составена од Никола Поповски, Ѓорѓи Спасов, Илинка Митрева па и Радмила Шекеринска, тој повеќе не пие кафе ниту со нив. Вистината е дека Бучковски нема база во СДСМ од која би можело да се изроди некаков отпор против Црвенковски на мајскиот конгрес во 2013 по завршувањето на локалните избори. Дури и можното повлекување на Црвенковски на тој конгрес, не значи дека на кормилото ќе дојде Бучковски бидејќи процедурата на СДСМ за избор на лидер сепак преферира внатрепартиски номинирања во кои екс-лидерот тешко ќе може да се пробие.

Кои се индициите од кои се раководи најголемата опозициска партија при утврдувањето на Бучковски како пречка за нивниот политички развој и победа над ВМРО-ДПМНЕ? Toa се неколку колумни во дневниот печат во кои Бучковски критички се осврнува на состојбите во СДСМ и повикува на подобрување на позицијата на партијата во општеството. Тоа од партискиот врв се толкува како „платен“ став од страна на нивниот противник на ВМРО-ДПМНЕ како што се толкува и секоја друга критичка нота од која тие се чувствуваат погодени. Но дали социјалдемократите на тој начин не се портретираат и себеси како што го портретираат својот политички противник – чувствителни на критика и одмаздољубиви кон секој што ќе се осмели да ја критикува нивната политика?

Сето тоа значи дека „Бихаќка“ попусто го извади својот најтежок „воен“ арсенал за да го нападне Бучковски во медиумите и на социјалните мрежи. Тој не е цел или мета за која треба да се употребат елитните партиски единици бидејќи тој во моментов а и во иднина не претставува никаква опасност за СДСМ. Секое поинакво толкување е погрешен пристап кој ги ослабува натамошните позиции на водството на левицата во изборната битка што им претстои со Владата.

Како оваа епизода ќе се одрази врз натамошната кондиција на социјалдемократите кои застанаа на чело на една поширока разнородна коалиција во обид да направат противтежа на коалицијата што ја предводи Груевски? Па, подобар политички спот против СДСМ не можеа да снимат ниту во штабот на противничката ВМРО-ДПМНЕ. Два аса на политичката левица водат војна до меѓусебно истребување. И тоа во услови кога најголемата опозициска партија реди порази на политичката сцена. Случувањата во опозициската левица нивните противници слободно може да ги пуштаат на своите медиуми како платена политичка програма за намалување на шансите на нивниот политички противник на претстојните локални избори.

Во една посмирена ситуација Црвенковски можеби ќе го викнеше на муабет Бучковски во својот кабинет на „Бихаќка“ и ќе направеа џентлментски договор за меѓусебно ненапаѓање. И двајцата имаат причини за тоа. Бучковски знае дека поголемиот дел од СДСМ се чувствителни на неговите напади врз Црвенковски бидејќи тој се' уште ја има аурата на неприкосновен лидер. Црвенковски, пак, е невозможно да не знае дека насочувајќи го мечот кон својот претходен пријател и соработник прави опасен преседан за секое идно водство на СДСМ кое ќе има несогласувања на врвот.