ВМРО-ДПМНЕ и СДСМ здружено во одбрана на јазикот

Партиите единствени во барањето до Брисел да ја преиспита неупотребата на придавката „македонски“

Слободанка Јовановска

Власта и опозицијата се обединија околу неупотребата на придавката „македонски“ во Извештајот на Европската комисија. Иако на неколку метри подалеку во парламентарната сала се препукуваа околу неговата содржина, на Сов��тот за евроинтеграции недостигаше да се испогушкаат, бидејќи успеаја да се усогласат околу заклучоците што ќе ги испратат во Брисел.

Според нив, ВМРО-ДПМНЕ и СДСМ со другите партии и надворешни членови на Советот ќе бараат од Европската комисија, во согласност со принципите за почитување на европската различност, „без одложување да ја преиспитаат употребата на придавката во контекст на јазичните и културни особености на Македонија, а во согласност со официјалната терминологија на ОН“. Тие, исто така, побараа без одлагање да се донесе одлука за старт на втората фаза од Спогодбата за стабилизација и асоцијација, која подолг период се пролонгира без објаснувања.

Како награда за поддршката околу јазикот, претставниците од власта застанаа зад заклучоците дека оцените во Извештајот се реален одраз на состојбите во земјата, дека Владата итно треба да изготви план со кој ќе одговори на препораките и забелешките од Брисел и дека државата ќе го вклучи целиот свој потенцијал за добивање датум за преговори. Добрососедските односи остануваат клучни за следната фаза во евроинтеграцијата, а одржувањето на македонско-грчкиот дијалог е потребно, како и дополнителните напори за изнаоѓање решение на спорот околу името, стои во документот усвоен во Советот. Накратко, пратениците се согласија дека тоа што ни порача Брисел е реално, а не неправедно, дека е неприфатлив притисокот околу македонскиот јазик, па нема зошто да се делат на патриоти и предавници и дека сфаќаат дека името е услов да се добие датум, при што ова последното со истата фраза со која ЕУ ни го направи услов за прием во членство - добрососедските односи.