Божидар Димитров ќе отвора бугарски училишта во Македонија

И Гвинеец станал Бугарин со пасош добиен од Софија

СофиЈа – „Македонските граѓани со бугарско државјанство треба да организираат училишта за обука на децата на бугарски јазик“, најавил за агенцијата Фокус Божидар Димитров, министер одговорен за Бугарите во странство.

„Зголемениот број бугарски граѓани што живеат во Македонија го поставува прашањето за обука на децата на овие бугарски граѓани на бугарски јазик. Можеби како во Западна Европа, САД, Украина и Молдавија веќе треба да се размислува за отворање бугарски училишта. Такви во светот имаме 135 и еден универзитет во Тараклија, Молдавија. При такво огромно бугарско малцинство во Македонија, можеби на прво место треба да се најдат неделните училишта за да можат Бугарите таму да учат литературен бугарски јазик, кој ќе им помогне при аплицирање во високи установи во Бугарија. Секоја година помеѓу 200 и 300 млади Бугари од Македонија учат во бугарските високи установи“, рекол Божидар Димитров.

Иницијативите за училишта, според него, обично доаѓале од локалните заедници, но Софија им помага со финансиски средства. Сега вакви училишта имало во Србија, иако таму има само 3.000 граѓани со бугарско државјанство, додека во Македонија, според Димитров, има над 50 000. „Време е бугарската заедница да се раздвижи, да стане активна и за почеток да создаде неделни училишта, пред се', во Струмица, Штип, Радовиш и во Куманово“, рекол тој. Притоа, тој проценил дека во некои македонски градови, како што е Струмица, тешко дека останал граѓанин без бугарско државјанство, а локалниот дијалект бил многу слаб и се зборувало речиси бугарски јазик. Процена на Димитров е дека бугарското национално малцинство станало второ според бројност во Македонија, кое го надминало српското.

„Ова се знае одамна од македонските власти и не гледам зошто се загрижени од овој факт. Бугарите се лојални граѓани на Македонија. Криминалот меѓу нив е многу помал отколку кај другите малцинства. Македонија треба да се гордее со фактот што во неа живеат европски граѓани и дека оваа бројка се зголемува неделно со околу 500 лица“, рекол Димитров. Според него, не се точни тврдењата на Бранко Црвенковски дека бројот на баратели на бугарски пасош се намалува по падот на визите, туку, напротив, се зголемувал.

Инаку, според Димитров, само неделава била донесена одлука да им се даде државјанство на 458 македонски граѓани , па сега од вкупно 5.773 издадени годинава, дури 4.200 биле за баратели од Македонија, а останатите за жители на Молдавија, Србија, Украина и од Израел. За паралела, тој посочил дека лани над 9.000 лица станале Бугари на ваков начин, а ако продолжи ова темпо, годинава бројката ќе биде дуплирана, па секој шести во Молдавија ќе има таков пасош.

Во последно време, според него, расте интересот за бугарско државјанство и во Ерменија и, колку и да звучи чудно, во САД и во Велика Британија, а најегзотичното барање стигнало од Гвинеја. (Н.Р.)