Уште еден трагичен пораз на нашите ракометари



Македонските ракометари иако во првото полувреме имаа и предност од плус шест голови во дуелот со Данска и напад за победа во последните секунди, натпреварот го завршија со пораз од 33:32

„Црвено-жолтите“ одиграа фантастични 25 минути во првото полувреме и имаа предност од 19-13, но во финишот примија три гола и на одмор се замина со 19-16.

Во вториот дел, Македонија играше под своето ниво, а противникот дојде до позитива од три гола, кои беа анулирани за три минути со одлична игра во одбраната. Во последната минута од средбата беше израмнето (32-32), а во последните 10 секунди противничкиот голман го одбрани ударот на Кире Лазаров , а одбиената топка дојде до Данците кои постигнаа гол преку еден брз контранапад.

Неколкуте илјади македонски навивачи што ја обоија белградска Арена во црвено-жолто не им помогнаа на ракометарите да дојдат до победа.

Најефикасни во македонскиот состав беа Кире Лазаров со 13 и пикерот Стојанче Стоилов со 7 голови. Кај Данците, Микел Хансен даде 12, а Ханс Линберг 8 голови.

Во претходниот натпревар од групата А, каде што игра Македонија, Шведска играше нерешено со Полска 29-29. Вечерва играат Германија и домаќинот Србија.

Наредниот натпревар Македонија го игра против Полска в понеделник, а со Србија игра во среда.