12.01.2012, 15:38 Коби Брајант со 40 коша ги почести и „џезерите“!
Лос Анџелес Лејкерс славеше кај Јута со 90:87 во продолжение, успешни беа и Клиперси во пресметката со Мајами (95:89)
Обата НБА-состава од Лос Анџелес се радуваа на победи во продолженија во американската професионална кошаркарска лига. Лејкерси триумфираа кај Јута со 90:87 (беше 78:78 во основниот тек на средбата) што е прв гостински успех за нив во оваа сезона, клиперси, пак, пред своите фанови го поразија Мајами со 95:89. Но, јунак на вечерта беше Коби Брајант, кој одново ја достигна границата од 40 коша, ефект што го дополни со осум скока.
„Публиката овде е прилично негостољубива. Не сакав да им овозможам задоволство да излезат од салата и да зборуваат дека победиле“, рече Брајант по средбата.
„Езерџиите“ можеа да го решат мечот уште во регуларното време, го имаа последниот напад во кој Брајант се обиде, меѓутоа неговиот обид заврши без реализација. Шанса за победа имаа и „џезерите“, но во екстра времето. Откако Пол Милсап обезбеди дополнителни пет минути за домашните тие се обидоа и да ја комплетираат мисијата. Џеферсон шутираше за седми триумф на Јута, но Бинам го изблокира ударот, па тимот од Солт Лејк Сити мораше да се помири со четвртиот сезонски пораз.
Израмнет беше и натпреварот меѓу Лос Анџелес Клиперс и Мајами. На крајот 95:89 за „клиповите“ покажаа дека имаат многу добар тим сезонава. Леброн Џејмс немаше своја вечер и во самата завршница пропушти да осигура победа за „жешките“ од линијата за слободни фрлања. Заслуга за конечниот триумф на домашните има Деандре Џордан, кој заби за недостижни 94:89 на 5,6 секунди до крајот.
Водечките екипи во лигата Чикаго и Оклахома остварија десетти победи во сезоната. „Биковите“ го надиграа Вашингтон со 78:64, а тандерси беа подобри на теренот на Њу Орлеанс со 95:85.
Резултати: Торонто - Сакраменто 91:88, Атланта - Индијана 84:96, Њујорк - Филаделфија 85:79, Бостон - Далас 85:90, Чикаго - Вашингтон 78:64, Њу Орлеанс - Оклахома 85:95, Сан Антонио - Хјустон 101:95 (во продолжение), Денвер - Њу Џерси 123:115, Јута - Лос Анџелес Лејкерс 87:90 (во продолжение), Портландо - Орландо 104:107, Лос Анџелес Клиперс - Мајами 95:89 (во продолжение).
|
