Поглед

Патека за нов старт

РОБЕРТ ДИМИТРИЕВСКИП

По децении мизерување и апатија, на полуживата кралица на спортовите во Македонија конечно и' се случи нешто убаво. Спортскиот комплекс „Билјанини извори“ во Охрид доби модерна атлетска патека и придружни содржини за овој спорт со сите нишани, на кои ќе можат да се одржуваат и меѓународни натпревари од висок ранг. Повеќе од скромната атлетска инфраструктура во државава е освежена со репрезентативен и функционален објект, кому деловите од арената „Филип Втори“ во Скопје и од Градскиот стадион во Велес со таква намена не му се ни до колена.

Реконструкцијата на охридскиот атлетски центар е настан од безмалку епохално значење за развојот на овој базичен спорт во земјава, но само ако означува пресврт и во неговиот третман. Објектот ќе си ја исполни примарната цел ако поттикне основање нови клубови и во другите делови од државата и ако привлече таленти и во техничките дисциплини, а не само во тркачките, со кои се занимава мнозинството од околу 150 активни атлетичари во моментов. Треба да се искористи и доаѓањето на атлетската легенда Сергеј Бубка на 16 мај, кога патеката свечено ќе биде предадена во употреба, за промоција на овој замрен спорт кај нас. Во таа насока треба да послужи и меѓународниот митинг закажан за три дена подоцна.

Меѓутоа, сето ова нема да има ефект ако Атлетската федерација на Македонија и понатаму добива смешни 5.000 евра за своите годишни активности. Уште помалку ќе се види аир од охридската убавица ако сличен објект не добие и главниот град, во кој живуркаат повеќето од одвај десетте активни клубови, на кои проблем им е да дојдат на тренинг во Скопје, а камоли во Охрид. Итната набавка на нови мерни инструменти и реквизити се подразбира кога времето се мери со стоперка, а идните шампиони кладиво можат да видат само на телевизија.