Карл Билд се заложил и Македонија да почне преговори

Поддршка за македонските интеграции од шефот на шведската дипломатија

Шефот на шведската дипломатија, Карл Билд, на состанокот на министрите за надворешни работи на земјите-членки на ЕУ во Луксембург, се заложил за почнување пристапни преговори со Македонија, јави дописникот на МИА од Гетеборг.

Почетокот на преговорите со Македонија, кој повеќе години е блокиран поради долготрајниот спор за името, беше повод на состанокот во Луксембург поголем број земји-членки на ЕУ да изразат мислење дека станува збор за чудна ситуација. Но, Грција не се повлече во своите ставови и затоа на Македонија и' останува да продолжи да чека, пишува шведскиот дневен весник „Дагенс-нихетер“.

Шведска вообичаено е една од земјите-членки кои се најголеми приврзаници на проширувањето на ЕУ. Сепак, кога се дискутираше прашањето за почеток на преговорите со Црна Гора, Карл Билд беше најгласниот противник.

„Ние и повеќе други земји-членки во ЕУ бевме посебно загрижени поради организираниот криминал во Црна Гора“, рече Карл Билд на прес-конференција во Луксембург, откако беше донесена одлука да и' се овозможи на Црна Гора да ги почне пристапните преговори. (МИА)