Нов обид за изградба на зграда на Општина Центар

Нов обид за продажба на државно градежно земјиште наменето за изградба на административна зграда на Општина Центар. Министерството за транспорт и врски распиша објава за отуѓување на земјиштето на кое се наоѓаат сегашните бараки на Општината.

Најповолниот понудувач ќе треба на свој трошок да го изгради објектот со намена „локална самоуправа“, а по изградбата, без надомест да и' го предаде во владение на Општина Центар.

Според одлуката на Советот на Општина Центар и одлуката на Советот на Град Скопје, најповолниот понудувач ќе биде ослободен од плаќање надоместок за комуналии за изградба на објектот. Половина од објектот, поточно 51 процент ќе биде наменет за потребите на локалната самоуправа, а 49 за комерцијални и деловни намени.

Почетната цена на електронското јавно наддавање ќе биде 2.800 денари за квадратен метар, а право на учество имаат сите физички и правни лица кои ги исполнуваат условите од објавата. Заинтересираните треба да достават пријави за учество во наддавањето најдоцна до 19 ноември, а лицитацијата ќе се одржи една недела подоцна, на 26 ноември.

Како што информираше на вчерашната прес-конференција портпаролот на Министерството за транспорт и врски, Драган Симоновски, распишана е и објава за отуѓување градежно земјиште наменето за изградба на комерцијално-деловен објект во Реонскиот центар Аеродром со вкупна површина од 4.259 квадрати.

Дел од објектот треба да служи како административна зграда на Општина Аеродром. Пријавите за учество на ова јавно наддавање треба да се достават најдоцна до 1 ноември. (С.Р.)