Oбјавени имиња на уште 12 лустрирани

Никој не знае до каде ќе оди објавувањето имиња на интернет

Љубиша Станковиќ


Комисијата за верификација на фактите на својата веб-страница вчера објави имиња на уште 12 лица за кои било утврдено дека биле соработници на тајните служби, со што го исполнуваат условот со кој се ограничува вршењето јавна функција.

Првото име на новиот список е поранешниот претседател на Уставниот суд на РМ, Трендафил Ивановски, кој уште во првиот бран на лустрацијата беше прогласен за соработник на некогашните тајни служби.

На новата листа се и Миленко Габер, поранешен директор на Заводот за вработување во Берово, Ѓорги Прцуловски, екс-претседател на Општина Ресен, поранешните директори и членови на Управни одбори: Михаил Андреев, Киро Јанчев и Бранко Темов. Следуваат имињата на поранешниот директор на Домот на културата во Битола, Петар Целакоски, екс-пратеникот во Собранието на Република Македонија, Киро Дојчиновски, потоа Стојан Чамински, некогашев висок полициски функционер, новинарите Хисен Шаќири, Мустафа Спахију и Реџеп Златку, кој е лустриран по службена должност, иако е нејасно што значи ова последното.

За разлика од пред два дена, за имињата на новите 12 лица кои се најдоа на тапет на Комисијата за верификација на фактите, не се објавени нивните досиеја.

Во петокот ноќта Комисијата за лустрација ги објави решенијата и документите за Слободан Угриновски- член на Советот на Град Скопје и лидер на партијата Титови леви сили, Вангел Гагачев - поранешен судија на Врховниот суд на РМ, Николче Бабовски - кандидат за пратеник во републичкото Собрание, Сејфедин Харуни - пратеник, Владимир Милчин- декан на Факултетот за драмски уметности (ФДУ), Шабан Шеху- советник во Влада��а на РМ, Јорданчо Чеврески- член на Советот на МРТ и декан на ФДУ, Махи Несими- амбасадор, Фаредин Мифтари - заменик-директор на КПУ Затвор-Скопје, Зоран Јовановски- член на Совет на општина Росоман и Коста Балабанов- член на Совет на Музеј на Македонија.

Дел од членовите на Комисијата беа против повторно разгледување на предметите со оглед на тоа што Уставниот суд укина одредби од стариот закон за лустрација, а Управниот суд ги укина решенијата на лустраторите. Ставот на некои членови на Комисијата за лустрација е дека со јавното објавување се кршат Уставот и правото на приватност на лицето прогласено за соработник, но претседателот на Комисијата Томе Аџиев и останатите членови, повикувајќи се на новиот Закон за лустрација, сметаат дека законската обврска мора да се почитува, а соработниците на тајните служби да бидат јавно објавени.

Осум дена за жалба до Управен суд

Сите лица кои се посочени од Комисијата за лустрација дека соработувале со тајните служби имаат право на жалба до Управниот суд во рок од осум дена од денот на доставување на решението. За поведување постапка пред надлежниот судот лицето треба да ја извести Комисијата. Како што е познато, според новиот закон за лустрација Комисијата има право да го објави досието пред отпочнување на судскиот роцес.

Доколку тужителите го загубат спорот пред Управниот суд тогаш решението на Комисијата за лустрација станува правосилно, односно казната за нив ќе биде престанување на извршување јавна функција. Доколку лицето не е задоволно од пресудата на судот има право да се жали и до судот во Стразбур.