Лустрација - Данчо Чеврески: Апсолутна невистина е дека сум бил кодош

Во документите објавени на интернет стои дека познатиот актер соработувал со службите од 1987 до 1995 година и ги информирал за лица од граѓанската десница, под псевдонимот „Фердо“, „Поет“, “Врховен“ и „Миладиново“

Наум Котевски


Познатиот актер Данчо Чеврески јавноста го доживеа како најголемо изненадување во лустрациската драма која од петокот ноќта доби свое продолжение на интернет страницата на Комисијата за верификација на факти.

Меѓу единаесет псевдоними чии досиеја кои со само неколку клика на компјутерот сега им се достапни на сите граѓани се најде и „Тањц“ - името под кое тајните служби, како што тврди Комисијата, го запишале Чеврески како нивен соработник.

Тој според објавените документи ја почнал соработката со службите во 1987 година и ги информирал за лица од граѓанската десница, под псевдонимот „Фердо“, „Поет“, “Врховен“ и „Миладиново“.

Вчера преку телефон контактиравме Чеврески кој е продуцент на филмот во режија на Столе Попов „До Балчак - приказна за Блискиот исток“. Тој е видно вознемирен поради, како што нагласи, скандалозното објавување на документите без да добие никакво решение. Досега го немал своето досие в раце, затоа што никогаш не се ни обидел да го побара.

„Непријатно е чувството после ваков скандал. Не сакам да ја водам оваа битка преку медиуми. Само ќе кажам дека станува збор за апсолутна невистина. Тоа ќе го докажам низ институциите на системот“, ни кажа со тивок, придушен тон Чеврески. На прашањето дали им верува во моментов на институциите актерот кој ја играше улогата на Димко во „Курирот на Гоце“, и кој е дел од уште неколку проекти во кои се велича м��кедонската револуционерна борба, вели дека мора да им се верува.

„Сум бил лојален на оваа држава и ќе останам лојален до крајот. Нема да дозволам некој да фрла кал врз моето име и дело“, вели Чеврески, кој е исправен пред „најдолгиот пат“. Во истоимениот филм на Бранко Гапо, Чеврески играше заедно со Ристо Шишков, кој во документите, пак, се споменува дека бил, наводно, кодошен од Владимир Милчин.

Чеврески кој беше декан на Факултетот за Драмски уметности и член на Советот на МРТВ вели дека ќе се обиде наредниве денови да се сконцентрира на завршувањето на филмот „До Балчак“, иако неговиот професионален ангажман сега дефинитивно е нарушен.

Инаку, во еден од документите објавен на интернет стои дека Чеврески е ангажиран од службите во 1987 година и тоа на доброволна основа, а соработката завршува во 1995 година. Тој, како што стои понатаму во документот, „доставувал безбедносно-интересни сознанија по линија на граѓанска десница“.

„Чевревски е вработен како асистент на Факултетот за драмски уметности во Скопје по предметот актерска игра. Со оглед на работно место Јорданчо е во можност да ги следи состојбите и на поширок план на Факултетот за драмски уметности во Скопје, „Вардар филм“ и други пунктови, собиралишта, манифестации на овие културни работници во градот и пошироко. Оперативниот однос со Чеврески е воспоставен врз база на претходни проверки и проучувања на неговите морални и идејно-политички квалитети“, се додава во документите.

Службите го оценуваат Чеврески како идејно позитивна личност „која ги застапува принципите на нашиот самоуправен пат во изградба на социјалистичките самоуправни односи“. Според нив, снаодливоста, комуникативноста, неговата волја и карактер ја сочинуваат основата врз која се темелат соработничките односи.