Поглед

Задоцнети зделки

Деспина Трајковска

Договорена зделка пред речиси две години, а јавноста дури сега дознава. Некогаш со години отпосле се обелоденува не само висината на потрошената сума, туку, и воопшто, намената на потпишаниот договор. Токму вака се однесуваат повеќе институции во државава и покрај законската обврска во одреден временски период да ги објават потпишаните зделки. Не ги засега ниту утврдената законска рамка ниту опомените од невладините организации, а да не зборуваме за моралната обврска да дадат отчет за потрошените пари, оти, сепак, не се нивни, туку се земени од џебот на граѓаните.

Ваков однос е карактеристичен и за Општина Центар, која во изминативе години троши милионски суми за проектот „Скопје 2014“. И дури дел од јавноста веќе почна да го пресметува секој потрошен денар за овој проект, за кој доволна е проста математика за да се утврди дека ги надминува најавените цифри за неговото чинење, општинарите од Центар доцна палат со објавувањето на милионските договори. Последен пример за тоа е изминатиот петок кога во еден ист ден обелоденија преку дваесет склучени договори од кои над десет ги парафирале пред повеќе од една година. Договор за постаменти (веќе изградени), за споменици (веќе излеани), за најмени магацини (веќе искористени)... Кога отпосле се соопштуваат вакви работи се остава простор за сомневање.

Не, не во прашање само Општина Центар. Таа е само дел од вкупната атмосфера во државава каде што властите како да и' свртеле грб на транспарентноста. Градоначалникот на Скопје, Коце Трајановски, беше гневен кога му поставија прашање зошто оградата за мост на Вардар ќе чини 1,7 милиони евра. Зошто некој воопшто поставува такви прашања? Дваесет години учиме за одговорност на оние што раководат со институции, а уште сме на почетокот.