Црвенковски ќе градел автопатишта, не споменици

Лидерот на СДСМ порача од Велес дека во нивната програма е зацртано автопатско поврзување на Македонија со Бугарија, Косово и Албанија

„СДСМ градел и ќе гради автопати и други корисни и значајни објекти, а не плажи, триумфални порти или жални врби“. Ова е ставот на Бранко Црвенковски на обвинувањата од ВМРО- ДПМНЕ дека во време на социјалдемократите не се градело ништо во Македонија. Потсетувањето на сработеното и планираното за иднина го соопшти на прес-конференција на автопатот Скопје - Гевгелија, кај Градско, каде што викендов оваа партија го имаше своето претставување во рамките на кампањата „Крени го својот глас“.

„Во време на СДСМ се изгради автопатот од Градско до Демир Капија, од оваа клучка, па до Демир Капија. Во времето на СДСМ се изгради автопатот од Смоквица до Гевгелија, се изгради автопатот од Скопје до Тетово, се изгради автопатот од Тетово до Гостивар, се изгради обиколницата на Скопје, најмодерно автопатско решение. Или се' заедно, повеќе од 130 километри автопат со инвестиција вредна приближно 200 милиони евра“, изјави лидерот на СДСМ, Бранко Црвенковски.

Црвенковски објасни и дека во нивната програма е зацртано автопатско поврзување на Македонија со Бугарија, Косово и Албанија. За Велешкиот регион, пак, приоритет ќе биде намалување на невработеноста и сиромаштијата.

Според кандидатот за градоначалник на Велес од оваа партија, Аце Коцевски, градот назадувал со сегашното раководство. „Велес од најдобра општина во Македонија, најнаградувана, сега стана сосем просечна општина. Општина која е во стагнација наместо да биде во развој. Тоа е еден од моите големи мотиви да не седам дома и да гледам сеир што се случува во Велес, туку да ги вложам сите мои знаења, способности, искуство, да му помогнеме на Велес и на велешани“, изјави, меѓу другото, кандидатот за градоначалник на Велес на СДСМ, Аце Коцевски .

Присуството на лидерот и раководството на најголемата опозициска партија во Велешко беше дел од работното лето на СДСМ. Како што соопшти потпретседателот Гордан Георгиев, посетиле повеќе од 30 села во општините Градско, Росоман и Чашка. Тој изрази големо задоволство од одличниот прием меѓу граѓаните на овие села и овие општини. „Ги слушнавме нивните проблеми, слушнавме една голема вистина дека на граѓаните веќе им е преку глава да живеат во страв. Преку глава им е цело време да седат дома и да ги слушаат неправдите што ги прави оваа власт. Од друга страна, слушнавме многу идеи, многу предлози што ќе бидат основа на нашата локална изворна програма“, изјави тој. (П.Р.)