Црвенковски ја обвини власта за лажен патриотизам

„Како министерот бил во Слупчане во слободно време. Нели вие работите 24/7“, рече лидерот на СДСМ на митингот во Крушево

Крушево - „Наспроти себе имаме режим без каква било идеологија, освен една, како да се задржи власта. И за остварување на таа цел, нема цена што не се подготвени да ја платат. Подготвени се бесрамно и бескрајно да лажат, да измислуваат и манипулираат, да казнуваат, да газат врз достоинството на луѓето, најбезобразно да го кршат и Уставот и законите. Секој кој претставува закана за нивната власт е непријател, кој треба да се уништи“, рече Бранко Црвенковски, лидерот на опозицискиот СДСМ на митингот во Крушево во неделата.

Според него, ВМРО-ДПМНЕ ја направил Македонија земја на политички затвореници, на затворени медиуми и уценети новинари, кон државните институции се однесуваат како да се приватно-партиска сопственост, парламентот го направија безгласна гласачка машинерија, претседателот е портпарол на ВМРО-ДПМНЕ, администрацијата послушна партиска војска, судовите извршители на партиските наредби, нагласи Црвенковски.

Тој ја обвини власта за лажен патриотизам, особено на прославата на денот на АРМ, кога министрите се поклонија и положија цвеќе на гробовите на борците на ОНА.

„Големиот патриот Груевски се обиде да ни објасни дека министрите тоа го направиле како приватни лица и во нивното слободно време. Какво слободно време, Никола, па нели работите 24 часа, седум дена во неделата“, рече Црвенковски, упатувајќи жестоки критики до премиерот и Владата.

Тој му забележа на Груевски за односот кон министерот за одбрана.

„За казна премиерот на прославата не се поздравил, го игнорирал министерот за одбрана. Како да не се работи за држава, за Република Македонија, туку за некакво приватно друштво, за кое не важи ни Устав, ни закон, ни ред, ни поредок. И не само тоа лажните патриоти од ВМРО-ДПМНЕ, излегоа со соопштение дека тие никогаш нема да се поклонат пред гробовите на оние кои убивале македонски граѓани и бранители. Значи пред гробовите не, а пред живите злосторници ќе се поклоните ли? Па заборавивте ли господа од ВМРО-ДПМНЕ, дека токму вие по наредба на Никола Груевски и повторно заради зачувување на власта и заради ништо друго, излеговте и од Рамковниот договор и од меѓународниот правен систем и ги амнестиравте хашките случаи за злосторства против човештвото. Вие одлучивте да ги ослободите од секаква одговорност живите злосторници, чии жртви беа македонски граѓани и бранители, а сега глумите лажен патриотизам и принципиелност пред гробовите на мртвите“, обвини Црвенковски.

Главниот виновник за покачување на цената на струјата, горивата, парното ..., според Црвенковски не лежи во Регулаторната комисија, туку во власта, под чија директива работи оваа комисија.

Кандидатот за градоначалник на Крушево, Јуца Ташули, пак, критикувајќи ја работата на локалната власт, која како што рече, не реализира ниту еден од своите големи проекти, најави дека негов приоритет ќе биде економскиот развој на градот. (М.Т.)