Поглед

Фреско-лустрација

Слободанка Јовановска

Операција „реставратор“, „фреските се лустрираат“, „зошто не се случи чудо и да се наполни буџетот на Македонија“ - се некои од забавните и сурово реалистички реакции по веста дека во црквата „Св. Димитриј“ се случило чудо преку ноќ, односно фреските самите се прочистија. По еден ден фасцинираност, стигнаа првите експертски и научни објаснувања, а едно од нив е дека вакво подмладување на фрески е забележано стотина пати во цркви низ светот и има пославни епизоди од оваа во Македонија.

Дека е повеќе природна појава отколку чудо, дека е хемиска реакција, а не феномен и дека можеби заиграле и крпи, поради тврдења на некои граѓани во контактните емисии дека виделе човечки, а не божји раце на дело...

Како и да е, Македонија се најде на страниците на светскиот печат, вклучувајќи ги и влијателниот „Вашингтон пост“. Во светот во кој главната вест е нонстоп зголемувањето на цената на нафтата и економската криза, во кој реалноста е сурова за мнозинството од жителите, чудата очигледно се првокласна вест. Откако со децении светските медиуми известуваа за чудото „Лох Нес“, па на крајот се дозна дека приказната била измислена од туристички причини“, зачудува колку ваквите чуда и натаму наидуваат на масовен третман во медиумите. И дека е доволно еден да поверува и да извести за тоа, а сите некритички да го преземат. Цивилизациско чудо е всушност што по волку примери, објавувањето вакви вести добива замав во целиот свет, што се виде и на 1 април, кога измислените вести осамнаа како сериозни. Сензационализмот секогаш бил придружен елемент на новинарството, но кокетирањето со суеверија ја одзема смислата на информирањето. Ако им се верува на експертите, чудо веќе не е да се исчистат фреските, туку на пример, ако се разбудите едно утро и си ги видите ѕидовите дома исчистени, а вие во тоа не сте учествувале.