19.10.2012, 12:34 Американски, дански и африкански звуци за старт на „Скопски џез-фестивал“
Со концертите на Американецот Ентони Брекстон и Данецот Пјер Дорг, вечерва во Македонската опера и балет во 20 часот, почнува 31. „Скопски џез-фестивал“, кој ќе трае до 23 октомври
Со концертите на Американецот Ентони Брекстон и Данецот Пјер Дорг, вечерва во Македонската опера и балет во 20 часот, почнува 31. „Скопски џез-фестивал“, кој ќе трае до 23 октомври. На полноќ, пак, во „Сити-хол центар“ настапува африканската група „Ле Сахал“.
Композиторот, саксофонистот, флејтистот, пијанистот и професорот Ентони Брекстон (1945), роден во Чикаго, веќе 40 години храбро навлегува во експериментите на американската музика. Под влијание на американските композитори на современата класична музика, Чарлс Ајвс и Џон Кејџ, но и на џез-саксофонистите Ворн Марш и Алберт Ајлер, како и на пионерите на европската авангарда Карлхајнц Штокхаузен и Јанис Ксенакис, Брекстон создава уникатен музички стил со свој графички базиран јазик, кој содржи богатство на традиции и жанрови. Ентони Брекстон во Скопје вечерва ќе настапи во форма на квартет, со „Diamond curtain wall“, заедно со Тејлор Хо Бајнум на труба, Џејмс Феи на алт-саксофон и Ерика Дикер на виолина. Зад себе има многубројни албуми (над 100 изданија) и настапи низ светот со влијателни имиња, а за критиката, станува збор за „ненадминлива фигура во музиката“.
По Ентони Брекстон настапуваат Данците Пјер Дорг (диригент и гитарист) со „Њу џангл оркестра“ составен од девет музичари, на кои како гостин ќе им се придружи флејтистот Шашанк Субраманиам од Индија. И овој ансамбл го збогатува џезот со нови звуци. Пјер Дорг се смета за една од најинтересните фигури на данската музичка сцена, а неговата музика претставува успешен микс од азиска, африканска, афро-американска и, се разбира, европска традиција, како производ на неговата љубопитност за други култури. Оркестарот „Њу џангл“, пак, е формиран во 1980 година, а инспирацијата за името ја добил од легендарниот џангл-звук на раниот „Дјук Елингтон оркестар“. Влијанието од Елингтон, како и од Чарлс Мингус се чувствува во нивната музика, иако тие продуцираат свој оригинален израз, кој се сместува во рамките на т.н. музика на светот.
Во „Сити-хол центар“, пак, на полноќ ќе настапи африканскиот нонет „Ле Сахел“. Оваа група името го позајмува од еден ноќен клуб во Дакар каде што во 1972 година почнале да се формираат нејзините контури. Јадрото на бендот го сочинуваат дел од најдобрите сенегалски музичари. Нивната музика е опишана како неодолива, суптилна форма на афро-салса, со благ допир на психоделијата до 70-тите, која се чувствува во оргулите на Чеок Тол, лидер на бендот. Групата ќе се распадне своевремено, но денес повторно се соединува издавајќи колекционерски албум со 12 стари снимки. (Т.И.)
|
