Богат викенд на „Скопски џез-фестивал“



Вечерва во МОБ, во 20 часот, ќе се одржи шпанско-бразилска вечер со настапот на триото на бразилскиот виолинист Рикардо Херз, а потоа и на шпанското трио „Бенавент - Ди Џиралдо - Пардо“

Викендов на 31. „Скопски џез-фестивал“ ќе се одржат шест концерти, меѓу нив и полноќните, кои ќе се одвиваат во „Сити-хол центар“.

Вечерва во Македонската опера и балет, во 20 часот, ќе се одржи шпанско-бразилска вечер со настапот на триото на бразилскиот виолинист Рикардо Херз, а потоа и на шпанското трио „Бенавент - Ди Џиралдо - Пардо“. Свинг, грув и шармантни импровизаци�� се најкус опис за музиката на Херз, кој го редефинира начинот на свирење на виолина. Триото на басистот Карлес Бенавент, тапанарот Тино ди Џералдо и саксофонистот и флејтист Хорхе Пардо, пак, се смета за состав од исклучителни мајстори на фламенко џез-фузијата и досега соработувале со сите значајни мајстори на шпанскиот музички израз.

Неделата, исто така, во МОБ, е посветена на европскиот џез денес, со швајцарското трио „Малколм Браф“ и шведско-норвешкиот состав „Атомик“. Како што кажува и самото име, централна фигура на швајцарското трио е пијанистот Малколм Браф, кој го доведува техничкото мајсторство на својот инструмент до совршенство. Критиката за него ќе каже дека тој создаде нова категорија пијанисти, бидејќи во неговите раце пијаното звучи како да е продолжение на неговото битие. „Атомик“, пак, формирана во 2000 година, очекувано е една од добрите предводници на скандинавската џез-сцена која е полна со иновативност. Нивната првична идеја беше бунт поради популарноста на т.н. скандинавски звук што го промовираат норвешките артисти на дискографските куќи како што е ЕСМ. Нивниот звук е експлозивна мешавина на американски фри-џез со европски карактеристики.

Во „Сити хол-центар“, вечерва се Британците Ентони Џозеф како вокал со неговиот петчлен бенд „The Spasm“, додека в недела на полноќ е настапот на оркестарот „Hidden“, исто така од Велика Британија. Станува збор за одлични имиња, кои на џезот му даваат една поинаква конотација. (Т.И.)