„Работниците умираат пеејќи“ гостува во Скопје

Преставата, која е годинашен апсолутен победник на фестивалот „Стеријино позорје“, ќе биде одиграна на 17 октомври на сцената на МНТ со почеток во 20 часот

Театарската претстава „Работниците умираат пеејќи“, која е годинашен, апсолутен победник на фестивалот „Стеријино позорје“ во Нови Сад, ќе биде одиграна на 17 октомври на сцената на МНТ со почеток во 20 часот.

Претставата е копродукција меѓу фондот „Хартефакт“ и театарот „Битеф“ од Белград, а е работена според драмата на Олга Димитриевиќ, победничка на конкурсот на „Хартефакт“ за најдобар современ ��пштествено ангажиран текст за 2010 година. Режисер е Анѓелка Николиќ, а ќе настапат актерите: Милан Ковачевиќ, Игор Бороевиќ, Марија Бергам, Марија Миленковиќ и други. Кореограф е Далија Аќин, а композитор на музиката Дарко Аџиќ.

Претставата минатата година премиерно е одиграна на матичната сцена на театарот „Битеф“ во Белград, била дел и од „Фестивалот на малите сцени“ во Кикинда каде што Анѓелка Николиќ е наградена за режија. На фестивалот „Стериино позорје“ добила шест „Стериини награди“, а гостувала на почетокот на октомври и на фестивалот „МЕСС“ во Сараево и на „Јоакиминтерфест“ во Крагуевац.

„Работниците умираат пеејќи“ преку брехтовскиот театарски израз дава поглед кон мачните промени што ги донесе долгогодишната транзиција.

Според драмската писателка Билјана Србљановиќ, која и била дел од жирито што одлучувал за наградениот текст на Димитриевиќ, вели дека овој целовечерен експресионистички социјално ангажиран мјузикл, на уметнички, филозофски и социјално освестен начин ја обработува темата на страдањата на најзагрозената општествена класа. Авторката на текстот, пак, изјавила дека работничката класа во Србија е несвесна за фактот дека е класа. „Национализмот е тој кој директно работи на подривање на таа свест, бидејќи национализмот секогаш инсистира на некакво фантомско ’ние’, и вели дека сите тие ’ние’ имаме исти интереси: и политичката елита, и работниците, и жените, и уметниците. Тоа едноставно не е точно бидејќи на крајот на денот многу добро се гледа нееднаквата дистрибуција на моќта, власта и капиталот во општеството“, рекла таа. Гостувањето на претставата во Скопје е во организација на регионалната платформа за активизам „Лице в лице“, што ја спроведува Центарот за медиумски активности (ЦМА). Од неодамна, како дел од платформата, излезе првиот број на македонското издание на списанието „Лице в лице“, кое во Србија излегува веќе година и пол, а во подготовка е и магазин кој ќе излегува во Косово и во Босна и Херцеговина. Списанието го продаваат најранливите категории луѓе во општеството. Половина од продажната цена е наменета директно за нив, додека втората половина е за активности кои им помагаат и за градење на системот кој ќе им овозможи полесна инклузија во општеството.