„Адам“ од Говрлево спореден со „Мислителот“ на Роден

Во Цанкарјев дом во Љубљана до 16 ноември ќе биде изложено познатото керамичко машко торзо Адам датирано 5.300-5.000 години пр.н.е

Во Културниот и конгресен центар Цанкарјев дом во Љубљана вчеравечер беше отворена изложбата „Адам од Говрлево“ во чиј фокус е само еден артефакт, добро познатото керамичко машко торзо Адам, датирано од периодот на доцниот неолит (5.300-5000 години пр.н.е.), откриено на локалитетот Церје - Говрлево во близина на Скопје од археологот Милош Билбија, сега покоен.

Изложбата, чиј комесар е Љубо Фиданоски, археолог, кустос за неолитски пер��од во Музејот на град Скопје, ја отвори Митја Гуштин, раководител на Институтот за медитеранско наследство од Копар (Универзитет на приморска Словенија). „Презентацијата на Адам од Говрлево во Љубљана е идеја на Митја Гуштин и Милош Билбија, стара повеќе години, но дури сега успеавме да ја реализираме. Врз основа на соработката на Музејот на град Скопје и Институтот за медитеранско наследство, што трае уште од 2003 година, Адам од Говрлево сега и' е претставен на словенечката публика, а подоцна ќе си добие свое место и во постојаната поставка на Музејот на град Скопје. Целта на изложбата е да го презентира овој милениумски наод како автентичен и уникатен репрезент на македонскиот неолит“, изјави по отворањето комесарот Фиданоски.

Митја Гуштин на презентацијата на фигурината на Адам во Цанкарјев дом, кој во оваа пригода го нарече храм на културата, гледа како на симболично заокружување на своето долгогодишно дружење со Билбија, кој беше кустос во Музејот на град Скопје.

„Најстарата претстава на маж пронајдена во Македонија, кај Милош, кој го откри, и кај мене, кој ја следев неговата работа, будеше желба да создадеме нешто ново. Фигурината поседува ретки неолитски паралели во Трансилванија, а во современата уметност мора да се спореди со ’Мислителот‘ на Роден. Со Милош планиравме и се договаравме да ги предизвикаме македонските и словенечките вајари да создадат нешто во духот на претставата на овој маж и со тоа да го поврземе далечното минато со денешнината. А тоа се' уште останува...“ , посочи Гуштин.

Изложбата, која публиката во Љубљана ќе може да ја види до 16 ноември, ја организираа Музејот на град Скопје, Цанкарјев дом и Институтот за медитеранско наследство Приморска од Копар. (К.Б.)