(ФОТО) Пластичен свет со фолклор во вибрациите на Александра Митковска



Третата вечер на „Модниот викенд - Скопје 2012“, синоќа беше во знакот на модата и филмот

Првиот дел од шесттото издание на „Модниот викенд - Скопје 2012“ секојдневно го турка планираниот моден ритам. Третата вечер на оваа модна манифестација, синоќа беше во знакот на модата и филмот. Најпрвин во Младинскиот културен центар беше прикажана програмата „Мода преку филм“, т.е. селекција на модни филмови, проект организиран од „Моден викенд - Скопје“ во соработка со „Берлинскиот фестивал на модни филмови“.

Вечерта прод��лжи во тој модно-филмски манир и со презентацијата на женската колекција „Пластичен свет“ на брендот „Вибразиони“ од Александра Митковска. Инспирацијата на Митковска е врамена во прецизноста што ја наметнуваат геометриските форми, кои видливо преовладуваат во оваа колекција. Во таа модерна „геометрија на вибрациите“ на креаторката, одлично комуницираат принтовите на свила и памук инспирирани од македонскиот фолклор. Базичните бои се крем, бела и нијансите на сива.

Од оваа ревија на Александра Митковска беше сниман и видеоматеријал, од кој ќе се создаде филм, кој во јануари ќе биде прикажан на „Берлинскиот фестивал на модни филмови“.  (Ј.П.)