18.10.2012, 12:39 „Црвено“ со Македонската филхармонија
Прв пат во Македонија ќе биде изведен Концертот за виола и оркестар од Емил Табаков, диригент од Бугарија, кој често диригира со нашата Филхармонија
Македонската филхармонија, вечерва во Домот на АРМ во 20 часот, ќе одржи концерт симболично насловен „Црвено“. Прв пат во Македонија ќе биде изведен Концертот за виола и оркестар од Емил Табаков, диригент од Бугарија, кој често диригира со нашата Филхармонија, а кој и вечерва ќе застане зад пултот. Како солист ќе се претстави еден од најистакнатите руски виолисти на денешницата, Александар Земцов, кој бил солист и при светската праизведба на овој концерт во Софија во март оваа година.
На концертот вечерва ќе биде изведена и Симфонијата бр. 2 од Александар Скрјабин, напишана во „црвениот“ тоналитет ц-мол, од каде што и насловот на настанот. Скрјабин и неговата музика се тесно поврзани со синестезијата (поврзаност на звукот со бои) и оваа симфонија претставува вистинска реткост на концертните програми поради нејзината комплексна партитура и технички барања од оркестарот, кои пак, се оправдани со големата звучност и изразените оркестарски ефекти.
Уметноста и умешноста на Земцов се меѓународно признати, носејќи му многубројни награди: прва награда на натпреварот „Елизе Мејер“ во Хамбург во 1997, прва награда на 8. Меѓународен натпревар „Брамс“ во Поертшаш, Австрија во 2001, а истата година е победник и на аудицијата за млади солисти во Ставангер, Норвешка, и на натпреварот „Тенуто“ во Брисел.
Од својата 19. година Земцов работи со неколку европски оркестри и во септември 2002 година е назначен за водач на групата виоли во Лондонскиот филхармониски оркестар. Исто така тој е член на гудачкиот ансамбл „Ермитаж“ и ансамблот „Разумовски“. Како солист настапува со Оркестарот на белгиското радио, Музикферајн Виена, Лондонскиот филхармониски оркестар и многу други, на престижни сцени како салата „Чајковски“ при конзерваториумот во Москва, Музикхале во Хамбург, Палатата на уметности во Брисел. Неговиот репертоар ги вклучува сите големи дела за виола. Од неодамна е назначен за професор по виола на школата за музика „Гилдхол“ во Лондон. (Т.И.)
|
