Белешка

И велосипедистите се дел од сообраќајот

Бојан Шашевски

Велосипедизмот зема замав во Скопје. На стари, нови велосипеди опремени со кошнички или седишта за деца, многубројни граѓани секојдневно вртат педали за рекреација, но и за да завршат некои обврски. Но, за жал, мора да се движат по коловоз и со страв да не ги собере некое возило. Зашто, црвените велосипедски патеки на повеќе локации воопшто не постојат, а онаму каде што се исцртани, блокирани се од паркирани автомобили, контејнери, автобуски постојки, билборди.

Позитивен знак е што разни граѓански прогресивни движења почнаа жестоко да се противат на маргинализацијата на велосипедистите. Ваквиот однос може да се смени доколку градските власти овозможат квалитетна велосипедска инфраструктура, велосипедистите да имаат идентичен третман со сите учесници во сообраќајот, а потребните патеки да не бегаат од урбаното планирање на градските транспортни релации. Безполезни се апелите за внимателно возење или функционирањето на „Изнајми велосипед“ доколку велосипедските простори не бидат врежани во проектните планови за улиците и булеварите. И на проширување постојни и новопроектирани коловозни решенија, без никаква селекција.

Многу често велосипедистите и пешаците мора да се движат и да си пречат по исти патеки. Додека градските власти ја овозможуваат ваквата дистинкција, полицајците треба два пати да размислат пред да пишат казна од 25 евра на некој што вози велосипед надвор од обележаните патеки. Се чини дека кога ќе се овозможат основни услови за возење превозно средство на две тркала, измените во Законот за полиција ќе станат логична алатка за регулирање на велосипедскиот сообраќај.