Македонските мировници не биле во опасност во Кабул

И хрватското Министерство за одбрана тврди дека немало спасувачка мисија во Авганистан, туку за ротација на контингенти

Македонскиот контингент, како и припадниците на другите мисии кои учествуваат во мировната мисија на ИСАФ во Авганистан во вторникот не биле во опасност. Ова го тврди и Министерството за одбрана на Хрватска, кое експресно реагираше на текстот објавен во хрватскиот весник „Јутарњи лист“ дека се случувала спасувачка драма во Кабул.

Министерството демантира дека имало спасувачка мисија и опасно извлекување на хрватските војници и на нивните колеги од Македонија, Црна Гора, Босна и Херцеговина и од Албанија. Тие ги потврдуваат информациите на македонскиот Генералштаб на АРМ дека враќањето на војниците со хеликоптер на хрватската армија било планирано неколку дена претходно, како дел од ротацијата на контингентите, кои ја завршиле шестмесечната мисија во Авганистан.

Осумтемина македонски војници кои учествуваа во Мисијата за тренинг и обука на авганистанските припадници на воената полиција, нивните семејства, пријатели и колеги во текот на денешниот ден ги очекуваа да пристигнат во земјава. Тие пред четири дена тргнале од базата Џулиен во Кабул, по што со хеликоптер биле префрлени во базата Баграм. Потоа со транспортен авион се упатиле кон Киргистан, од каде што секој треба да се упати кон својата матична земја.

И покрај интересот на медиумите да имаат средба со мировниците, од Министерството за одбрана велат дека тоа дополнително ќе се реализира, поради посебните процедури низ кои треба да поминат војниците по нивното враќање во земјава.

Според надлежните во АРМ, војниците се здрави и живи и немало никакви проблеми при нивното враќање од мисијата.

„Војниците не биле нападнати, тоа со сигурност го знаеме. Од базата во којашто биле со хеликоптер биле префрлени на следната локација, од каде што требало да заминат дома. Засега немаме сознанија дека биле опколени, ниту, пак, дека биле цел на напад“, велат извори од АРМ.

Два дена по настанот, хрватски „Јутарњи лист“ објави текст дека хрватските пилоти, кои работат како инструктори во школата за Воена полиција во Кабул,  успешно евакуирале 38 војници во исклучително сложени услови од базата Џулиен во Кабул. Извлекувањето било извршено со зајмен хеликоптер од авганистанската војска „Ми17“, а војската на САД дозволила нивни војници да полетаат со овие хеликоптери како обезбедување. Протестите на локалното население против филмот „Невиноста на муслиманите“ биле причина меѓународните сили и базите во кои се сместени да бидат цел на терористички напади, а безбедноста да биде подигната на највисоко ниво, пишуваше весникот.

Министерството за одбрана на Хрватска, пак, тврди дека текстот за опасно извлекување на војниците во мировната мисија ИСАФ во Авганистан не се точни. Припадниците на хрватскиот воздухопловен тим со два лета ги префрлиле членовите на менторскиот тим од возилото на воената полиција до аеродромот во Кабул, а маршрутата била однапред договорена, односно два дена пред тргнувањето на пат.

„Не станува збор за никаква евакуација и спасување од опколена воена база. Станува збор за редовен транспорт на припадниците на контингентите“, соопшти хрватското Министерство за одбрана. Тие, сепак, потврдуваат дека на почетокот се разгледувала можноста војниците да летаат со хеликоптер на американската војска од Баграм. Но, тоа било откажано поради однапред планираните обврски на војската на САД. (Д.Т.)