Едиторијал

Алал да ни е, први сме

Соња Маџовска

Македонија живее во мизерија и хаос. Вака ја отслика земјава угледниот британски весник „Економист“ со тоа што ја смести нашата земја на прво место во светски рамки според лошите услови во кои живее населението.

Од 92 земји во светот, Македонија има најголема стапка на невработеност од 32 отсто, и висока стапка на инфлација од над 3 проценти.

Растот на цените и растот на невработеноста, се двата критериуми што ја однеле земјава на шапмпионското прво место во „Економист“ според индексот на мизерија.

Многу тежок збор, но иако, македонското население секојдневно ја чувствува кризата на своја кожа, кога тоа ќе го потврди некој од надвор, звучи поразително и тажно. До пред извесно време мислевме дека ние Македонците живееме полошо од жителите на сите европски држави, но сега излегува дека живееме најлошо од сите во светот.

Фактите се немилосрдни. Колку и да сака Владата да ја прикрие сиромаштијата со споменици и триумфални порти, Македонија е рекордер само по неколку работи. Според невработеноста од 32,1 проценти, и со над 30 отсто сиромашно население.

Според последните статистички податоци стапката на сиромаштија изнесува 30,9 отсто, или над 600 илјади граѓани преживуваат со 100 денари на ден. Тоа е една третина од вкупниот број жители чии приходи не ги задоволуваат ниту минималните животни потреби.

И наместо да се тркаме со другите земји по влез на странски инвестиции, со нови вработувања, со пристојни цени и со подобар животен стандард, ние според стапката на сиромаштија и на невработеност, во светот бевме и остануваме недостижни.

Најлошото од се' е што со години Македонија не мрднува од овие црни состојби. Со години никако не можеме да се одлепиме и да ја намалиме сиромаштијата и невработеноста под 30 проценти. Над 600 000 македонски граѓани се без работа, над 50.000 семејства се на социјалните списоци, а просечната плата е 330 евра, со која, исто така, сме први во Европа, но гледано од назад кон напред. Први, односно последни сме и според бруто домашниот производ по глава на жител од само - 7.400 евра, кој минимално пораснал изминативе години.

Излегува дека кај нас растат само невработеноста, сиромаштијата, цените и сивата економија. Цените во изминативе години пораснаа над 70 отсто, но главниот проблем е што приходите не се зголемуваат. Па така разликата меѓу цените и платите е огромна.

И сето ова, треба некој од надвор да ни го каже, за да не освести, бидејќи дома за секојдневните проблеми не се разговара, туку ги ставаат под тепих.

Властите во земјава сакаат да ги коментираат само убавите работи, а не и лошите. Тоа дека сме први по сиромаштија според „Економист“, вчера не сакаше да го коментира министерот за финансии Зоран Ставрески. Вели дека станува збор за новинарски напис, а не за оценка на реномирана меѓународна институција.

Единствено со што земјава може да се пофали изминатава година е дека сме рекордери по излеани споменици. Тие само на момент може да ни го подигнат чувството на оптимизам и достоинство, но не и да ги нахранат сиромашните, да отворат работни места, да ги платата сметките за струја, парно, вода, телефон.

Листата на „Економист“ треба да биде освестување за Владата, која треба многу посериозно да се зафати со решавање на проблемите на обичните луѓе и подобрување на стандардот на граѓаните. Наместо да трча да ја демантира веста.