Нема криза за нив, ќе си ги зголемат платите

Додека владите на другите земји објавуваат податоци за намалување на платите на функционерите, во Македонија се случува обратно

Светлана Унковска


Владата нема образложение за потребата од зголемување на платите на функционерите, а опозицијата, и покрај тоа што најави дека ќе гласа против, нема начин да го спречи донесувањето на законот со кој се предвидува покачување од пет проценти. Со донесувањето на измените на Законот за плати на избрани и именувани функционери, што, најверојатно, ќе се случи в понеделник, од декември годинава ќе бидат зголемени платите и надоместоците на функционерите, како што се носителите на највисоките државни функции, министрите, пратениците, судиите...

Во образложението на предлог-измените на Законот, поднесени од Министерството за труд и социјала, само кусо се наведува дека е предвидена можност за корекција на платите за 5 проценти, што одложено ќе се применува од декември годинава. Предложените измени, како што се наведува, имале за цел да се обезбеди усогласување на законот со планираните средства за плати во јавниот сектор во 2012. Натаму уште се додава дека измените се предлагаат заради усогласување на платите со планираните средства за плати во Буџетот за 2012 година, што пратениците го донесоа пред Нова година, и дека во тоа се гледа можност за корекција на нивните плати.

Во многу држави и поголеми економии од нашата, владите носат мерки за ублажување на економската криза, почнувајќи од самите себе. Така, минатата недела белгиските пратеници прифатија нивните плати за годинава да бидат намалени за пет проценти. Хрватскиот премиер Зоран Милановиќ, пак, донесе одлука да ги намали привилегиите на функционерите, да ја ограничи употребата на службените автомобили, мобилните телефони, службените патувања и други трошоци. Владата на Хрватска пресметала дека со овие мерки ќе се заштедат околу 133 милиони евра.

Во многу европски парламенти се размислува за намалување на платите и привилегиите на носителите на власта, но македонските функционери, се чини, не се оптоварени со такво чувство на одговорност. Во услови кога и економскиот магазин „Економист“ не' рангира како најмизерна земја, со висока невработеност и пораст на сиромаштијата, се носат одлуки за зголемување на платите на носителите на функции.

Ваквата одлука се очекува да придонесе за дополнително продлабочување на социјалниот јаз. Пеце Груевски, од синдикатот на УПОЗ, изјавил дека во услови на економска криза, која најмногу ги погодува работниците и сиромашните слоеви на населението, неправедно е функционерите да си ги зголемуваат платите. Тој реагира на тоа што пратениците не го прифатија амандманот на синдикатот со кој се предлага функционерите да се откажат од покачувањето.

„Сметаме дека повторно се прави една неправична распределба и во услови на оваа криза кога товарот од секојдневните покачувања на цените најмногу ги чувствуваат оние со најниски плати, требаше да биде одлучено поинаку“, рекол синдикалецот Груевски.

Со овие покачувања, нето-платата на претседателот на државата Ѓорге Иванов од сегашните 78.424 денари ќе достигне нешто повеќе од 82 илјади. Шефот на парламентот, Трајко Вељаноски, пак, чија месечна плата е поголема од онаа на Иванов и изнесува околу 88 илјади, со зголемувањето од пет проценти месечно ќе добива 92 илјади. Покачување од пет проценти ќе добие и премиерот Никола Груевски.

Македонските пратеници, пак, сега имаат плати од по околу 60 илјади денари, што значи дека, откако ќе го донесат Законот, нивните месечни примања ќе бидат поголеми за околу три илјади денари. Во овие суми не се пресметани дневниците за учество на седници, надоместоците кои ги добиваат како претседатели на комисии и работни тела или пак како координатори на пратенички групи, службеници дневници и плус трошоците за гориво и мобилен телефон. Според последните податоци, просечната плата во земјата изнесува околу 21.000 денари, но голем број од работниците земаат далеку пониски месечни примања.