18.11.2011, 15:23 Се испразни Мавровско Езеро
Водата во акумулацијата е за 7,29 метри пониска во споредба со истиот период лани.
Маврови Анови - Во Мавровско Езеро има двојно помалку вода за производство на електрична енергија во споредба со минатиот ноември. Во акумулацијата се наоѓаат 75 милиони кубни метри вода, а котата на водата е за 7,29 метри пониска во споредба со истиот период лани. Во зависност од конфигурацијата на теренот, на места е спуштена водата за повеќе од стотина метри.
Во овие есенски денови, езерото личи на бара. Црквата „Св. Никола“, која се наоѓа на јужната страна на некогашното Мавровско Поле и беше под вода уште со полнењето на Мавровско Езеро, деновиве е на суво и до неа може да се дојде од сите страни. Малата резерва на вода во езерото се должи, пред се', на неповолната хидролошка година која беше сиромашна со снег и со врнежи, но и со предвремено исполнување на годишниот производствен план.
Во АД ЕЛЕМ потврдуваат дека годинава беше сушна, а тоа негативно се одрази врз полнењето на акумулацијата. Во пролетните месеци поради малите снежни врнежи не се остварија планираните дотоци вода од топење на снегот. Како во пролетните, летните, така и во овие есенски денови нема дожд, па дотокот на вода во Езерото е значително намален. Сега во езерото се влеваат по околу 500 литри во секунда, што е незначително во споредба со претходните години.
Состојбите во мавровската акумулација ќе се подобрат со изградба на акумулацијата Луково Поле, на планината Кораб, која треба да почне да се гради идната година. Годишно во неа ќе се акумулираат околу 40.000.000 кубни метри вода, која по преработката во хидроцентралите „Црн Камен“, која треба да се изгради и во постојната „Врбен“, ќе се влева во мавровската акумулација. Тогаш и резервите вода за производство на електрична енергија во ХЕЦ „Вруток“ и „Равен“ постојано ќе бидат поголеми и Езерото секогаш ќе биде полно.
Инаку, Мавровскиот хидроенергетски систем што го сочинуваат хидроцентралите „Вруток“, „Равен“ и „Врбен“ уште во ноември го натфрлија годишниот план за околу два процента. Поради ниските температури и потребата од електрична енергија, Мавровските хидроелектрични централи деновиве работат турбо и дневното производство се движи меѓу два и три милиони киловатчасови електрична енергија. Ако продолжат со ова темпо на работа, резервите ќе се потрошат за еден месец. (К.К.)
|
