18.11.2011, 15:41 „Манифестот на Македониумот“ до вчера го поддржале 140.000 граѓани
Повеќе од 140.000 граѓани од сите националности, возрасни категории и од различни градови, како и 294 граѓански организации од целиот спектар на општеството кои претставуваат различни општествени групи и групации, заклучно до вчерашниот ден, дадоа поддршка на „Манифестот на Македониумот“
Во 19 часот вечер завршува теренската акција за поддршка на „Манифестот на Македониумот“, која беше организирана на територијата на целата земја со цел презентација на ставовите, поентите и гледиштата околу обидите за загрозување на македонскиот идентитет, како и согледувањата на јавноста за тоа.
Манифестот за сопирање на негирањето на македонскиот јазик во јавноста го претставија група македонски спортисти и уметници, како реакција на изоставувањето на придавката „македонски“ во Извештајот на Европската комисија за напредокот на Република Македонија.
Поддршка на Манифестот преку социјалната мрежа Фејсбук, на групата Манифест на Македониумот, заклучно со вчерашниот ден, дале над 10.000 граѓани. Можноста за поддршка преку Фејсбук продолжува до 20 ноември.
Од организацискиот одбор соопштуваат д��ка упатиле официјално барање за средба со претставници на Делегацијата на Европската Комисија во Република Македонија. Средбата е во функција на создавање адекватна можност за претставување на ставовите пред претставниците на европските институции.
- Средбата е можност на која конструктивно и во духот на заедништвото би можеле да продискутираме за причините, мотивот и целите на нашата активност, да ги пренесеме ставовите кои владеат во македонското национално ткиво по наведените прашања опфатени со Манифестот, како и да ги претставиме нашите следни чекори кои планираме да ги спроведеме во насока на превенирање на натамошни активности со кои би се загрозил нашиот национален македонски идентитет, се вели во соопштението од организацискиот одбор.
|
