Вук Драшковиќ тврди дека добивал смртни закани




Лидерот на Српското движење за обнова (СПО) Вук Драшковиќ изјави дека добива закани од еден министер, како и оти добил заканувачко писмо од организацијата „Црната рака“

Тој истакна дека пред околу 15 дена добил мејл од Белград во кое на смрт покрај него се осудуваа и други лица, меѓу кои и српскиот претседател Борис Тадиќ.

- И двете писма ги предадов на полицијата. Мислам дека сторителите можат лесно да бидат откриени, но се плашам од друг резултат. Неодамна полицијата откри од каде се испратени анонимните закани, а тие беа испраќани од кабинетот на еден министер и од неговиот телефон. Полицијата беше во неговиот кабинет, а потоа забрани објавување на резултатите од истрагата, наведе Драшковиќ.

Тој наведе дека има луѓе кои сакаат да го замолчат.

- Сите тие кои во последните децении на на минатиот век се виновни за сите војни, криминал и трагедијата на српскиот народ во Косово денес се обединети со цел да ги блокираат сите патишта на Србија кон Европската унија. Тие јавно тврдат дека Америка пропаѓа и оти ЕУ ќе се распадне, а Србија повторно ќе има можност да биде лидер на хаосот во регионот. Србија се врати во 90-тите години и повторно ги проживува, посочува Драшковиќ.

Тој истакна дека е сигурен оти го прислушуваат поради што ја продолжува „борбата за Србија во Европа“, за тоа да бидат судени „неказнетите убици на тајната полиција на Слободан Милошевиќ и да бидат обелоденети неоткриените злосторства“. Тој бара и да се отвори „црната книга на тајните служби и да се отворат тајните досиеја“.