20.11.2011, 12:49 Аџиев: Новинарите следни за лустрација
Новинарите се следни за лустрација, е ставот на претседателот на комисијата за лустрација Томе Аџиев, откако според него ги поминале повисоките функции во државата.
“Досега ги поминавме условно кажано повисоките функции во државата. Тргнавме од претседателот на државата, пратениците, премиерот, министрите, па судските органи, академиците, Уставниот суд и сега веќе почуствувавме дека имаме можност да ставиме во функција и други и во рамки на Комисијата водевме расправа и рековме, ќе ги ставиме и новинарите и носителите на јавни функции во други институции регистрирани согласно законот. Во тоа влегуваат нели политички партии, невладини организации, верски заедници и новинарите, односно основачите на приватни медиуми и новинарите и уредниците“, изјави Аџиев, во интервју за “Радио Слободна Европа“, пренесува Нетпрес.
Според првиот лустратор, комисијата истражува и кога ќе добие одредени релевантни податоци за лицето, истото се проучува.
“Не правиме редослед туку ги пуштаме сите во органите со кои соработуваме, тие ги истражуваат и кога ќе добијат одредени релевантни податоци за одредено лице ни доставуваат информација и ние проучуваме за тоа лице бидејќи имаме добиен�� сознание дека има некакви документи за него. Приоритет не правиме, сите се за нас исто битни“, додава Аџиев.
Запрашан за тоа што ќе следи откако се утврди дека некои новинари биле соработници на тајните служби, Аџиев вели дека “доколку се утврди дека некој уредник или новинар од приватните медиуми, дали пишани или електронски, бил соработник со тајните служби, обврска е на сопственикот прво да ги предвиди тие обврски во нивниот акт и второ да ја извести Комисијата дека тој акт е изменет каде што се бара дополнителниот услов за вршење на јавна функција и трето да е негова обврска и одговорност ако тој не сака да го разреши од функцијата, а ние само ќе констатираме дека тој не го исполнува условот за вршење на таква функција“.
Во врска со честите критики околу селективноста на Комисијата и потешкотиите да се отвори прашањето на одговорност на актуелните претставници на функции од власта, Аџиев вели дека Комисијата не ги разликува носителите на јавни функции дали се носители на јавни функции од опозиција или од власт, или независни.
|
