21.11.2011, 15:08 Новиот албум на Кејт Буш носи инспирација
„50 зборови за снегот“ на ексцентричната пејачка излезе овој месец за нејзината сопствена издавачка етикета „Fish People“
„Педесет зборови за снегот“, новиот албум на ексцентричната уметница Кејт Буш, ги израдува, но во исто време и ги изненади нејзините фанови. Албумот е прекрасна поетска читанка со меланхолични мелодии, опишан е како албум со моќна атмосфера кој ја разбудува фантазијата, како имагинативен, контемплативен. Тоа од една страна, но од друга, Кејт Буш изненадува со брзината на нејзината творечка креативност, како и со промената на нејзиниот музички фокус. „50 words for snow“ доаѓа многу брзо по „Director's cut“ (2011), и покрај тоа што „Director's cut“ претставува верзии на нејзините албуми „The Sensual World“ од 1989 и „The Red Shoes“ од 1993 година. А, музичкиот израз зачудува затоа што малку се помрднува од оној повеќе енергичен и импулсивен пристап на Буш по кој ја препознаваме од 80-те. Како и да е, Кејт Буш, една од највлијателните пејачки воопшто во историјата на модерната музика, се враќа на сцената и повторно многу моќно, многу инспиративно, како што тоа го правеше во минатото, со прекрасен албум кој возбудува, кој ве тера да сонувате. Но, што друго и да се очеку��а од неа?
Новиот, десетти по ред студиски албум на Кејт Буш, издаден за нејзината сопствена етикета „Fish People“, содржи седум долги композиции, трае над 65 минути и потсетува на нејзиниот легендарен „The Sensual World“. Еден музички критичар ќе запише: „Албумите на Кејт Буш се како хронологија на љубовните врски на една жена. Тие први ја поседуваат страста, имаат опивачки мелодии, крици, воздишки... Со новиот албум, Буш како да сака да внесе малку мистерија во својата љубов... Зимската идила е погодена со секоја нота...“
Инаку, последниот студиски албум на Кејт Буш кој содржи целосно нов материјал е „Aerial“ од 2005 година. И „50 words for snow“, кој доаѓа по шест години пауза, иако, како што кажавме, е малку поинаков од оние остварувања што Буш ги реализираше на врвот на нејзината кариера, сепак ја поседува нејзината препознатливост. Се разбира, тоа е нејзиното најсилно оружје - гласот. Музиката и овде е еклектична, движејќи си низ палета од различни стилови, но најмногу внимание се посветува на атмосферата, да се постигне наративното значение. А, токму двете специфики, еклектицизмот и гласот, ја направија Кејт Буш една од најуспешните женски вокалистки во Велика Британија во изминативе три децении.
Кејт Буш (1958, Кент, Лондон) со својата специфична музика, со својот фантастичен експлозивен глас кој опфаќа дури три октави, и нејзиното специфично „врескање“, со прекрасните композиции во кои музиката и лириката имаат подеднакво важно значење, стекна огромен број на фанови уште со првиот хит од 1978 - „Wuthering Heights“, инспириран од познатиот роман на една од сестрите Бронте. Оствари огромно влијание врз многу други музички артисти во светот. Покрај музиката, се истакна и по својот целокупен имиџ, како модна икона, па многу светски модни дизајнери и посветуваа цели колекции. Кејт Буш беше една од најфотографираните жени во Британија. Нејзините почетоци во кариерата се должат на Дејвид Гилмор од „Пинк Флојд“, по чија препорака на свои 16 години склучува договор со познатата дискографска куќа „ЕМИ“. Со нејзиниот трет албум „Never for Ever“ од 1980, станува првата британска соло изведувачка на првото место на британската топ скала. Во 1987 година ќе ја добие „BRIT Award“ како најдобра британска соло изведувачка. И денес не се забораваат сингловите „Running Up That Hill“, „King of the Mountain“, „Babooshka“, „The Man with the Child in His Eyes“, „Don't Give Up“ со Питер Габриел... Соработуваше со широк дијапазон на уметници, како гитаристите Ерик Клептон, Џеф Бек, Дејвид Гилмор, басистот Мик Карн, виолинистот Најџел Кенеди...
|
