22.11.2011, 14:42 Битола остана без јавен градски превоз
Битола - Битола денеска остана без јавен градски превоз. Празни беа автобуските постојки, бидејќи автобусите стоеја на паркингот кај градското шеталиште. И основните и средни училишта останаа полупразни откако превозниците во знак на протест на еден ден го прекинаа бесплатниот ученички превоз. Околу три илјади ученици од Битола, Прилеп, Демир Хисар, Крушево и Ресен вчера не стасаа на училиште.
„Половина од учениците не дојдоа на настава. Во нашето училиште учат и деца од 14 околни села и сите што не се снајдоа со приватни возила останаа дома“, вели Јованка Трајковска, помошник директор на ОУ „Крсте П. Мисирков“ во селото Бистрица.
И покрај заканите и предупредувањата Министерството за образование не најде начин како да им исплати еден милион евра на битолските превозници за бесплатниот превоз во изминатите две години.
Превозниците по преговорите со Општината добиле ветување дека ќе им бидат исплатени само дел од парите, како и дека ќе добијат и гориво за извесно време. Но, тие ја одбиле ваквата понуда како нерационална.
„Градоначалникот Владимир Талески се обидуваше да најде решение за нашиот порблем за да не дојде до овој протест. Ни понуди некои солуции, но за нас т��е не се прифатливи. Ако прифатевме гориво, потоа ќе имавме проблем со УЈП, оти нема да прикажуваме трошок, а ќе остваруваме некоја добивка. Се' тоа повлекува реперкусии, особено што ние сите сме месечни ДДВ обврзници“, вели Сашо Владимировски, претставник на „Лука Експрес“ од Битола.
Заглавени во долгови до гуша 11 автобуски превозници од Битола кои покрај школскиот превоз ги имаат и градските и приградски релации два месеца не им дале плата на своите вработени, а горивото го покривале од свој џеб. На свој ризик, велат, ќе возат уште до петок.
„Им даваме рок до петок на сите надлежни институции во државата да најдат решение за нашиот проблем, што секако треба да биде прифатливо за нас. Во спротивно ќе мора да преземеме порадикални мерки. Бидејќи не е само гориво во прашање, тука се и други фирми кои не' опслужуваат, како и нашите вработени“, се закануваат превозниците.
До нив допрела веста дека откако си ги побарале парите за бесплатениот превоз, директорите на некои средни училишта во Битола почнале да прават ревизија на списоците на кој ученик му следува бесплатен превоз, а кој може да оди пеш на училиште. Иако бесплатниот превоз важи за сите оние што живеат над 2 километра од училиштето, директорите ги советувале децата да не се качуваат веќе во автобуските.
„Имаме информации дека некои средни училишта почнале со ревизии на потврдите кои им ги издаваат на децата за бесплатниот превоз. Нас тоа не не' засега, иако нашата добивка ќе биде помала. Треба да ни платат за нашите услуги“, велат превозниците.
Во разрешување на проблемот се вклучени сите надлежни институции во државата, а локалната власт од Битола побарала помош и од ЗЕЛС. (А.Б.)
|
