22.11.2011, 12:44 ПАСОК и Нова демократија разјадени одвнатре
Папандреу сака да остане лидер на партијата, Самарас им се заканува на оние што мислат поинаку.
Од нашиот дописник
Миркица Поповиќ
Атина - Двете големи грчки политички партии се соочуваат со внатрешни турбуленции по избирањето на новата влада. Во ПАСОК се' повеќе се шушка околу иднината на Јоргос Папандреу како лидер на партијата, додека пак во десничарската Нова демократија зовриваат расправиите меѓу либералните и националистичките струи во партијата.
Уште пред избирањето на новиот премиер, во медиумите кружеа гласини дека Папандреу го одолговлекува објавувањето за да си ја осигура и позицијата лидер на партијата, бидејќи неговиот мандат како лидер на социјалистичката ПАСОК е пред истекување.
Откако Лукас Пападимос ја презеде премиерската функција, почнаа шпекулациите дека дел од високите политичари во партијата барале од Папандреу да преземе нови иницијативи и да започне процесот за избирање на нов лидер на партијата. Се слуша за многу договарања зад завесата околу тоа кој би можел да ја води партијата. Според некои проценки, Папандреу значително ја загубил и поддршката во партијата. Според телевизијата Скај, Димитрис Репас, еден од министрите на ПАСОК и во преодната влада дал предлог Јоргос Папандреу да остане како претседател на партијата, но на престојните предвремени избори партијата да најде друг кандидат за премиер. Во меѓувреме, поранешниот грчки премиер има постојано средби со министрите и високите претставници во партијата и советот на ПАСОК и околу работата на владата, но и околу нивните мислења за иднината на партијата.
Додека еден дел од ПАСОК ја отвара дебатата за избори во партијата, други му изразуваат поддршка на Папандреу. Еден од нив е и министерот за заштита на граѓаните, Христос Папуцис, го поддржа Папандреу за претседател на партијата, додавајќи дека разговорот за промена на лидерството не е на место. За разлика од него, министерот за развој и конкурентност, Михалис Хрисохоидис во изјава за радиото Реал ФМ отворено покажа желба да се кандидира на внатрешните избори во партијата.„Имам право во некој момент и јас да се кандидирам, ако започне таков процес во ПАСОК, но под услов да се знае дека при изборите целосно ќе се почитуваат сите процедури“, изјави Хрисохоидис.
Засега останува неизвесно кои ќе бидат следните чекори на ПАСОК, но самата партија за да стави крај на шпекулациите испрати соопштение со објаснување дека приоритет на Папандреу како лидер на ПАСОК е успехот на сегашната влата и стабилизирање на државата.
Иако анкетите на некои од медиумите покажуваат дека се зголемува рејтингот на опозициската Нова демократија, внатре во партијата се одвиваат кавги. Во партијата се појавија несогласувања и околу учеството на Нова демократија во преодната влада. Еден од пратениците откако коментираше дека Нова демократија ќе потоне поради националистичките струи во партијата веќе заработи црвен картон и отпишување. Лидерот на партијата Адонис Самарас упати закана за исфрлање на бунтовниците од партијата. „Следниот кој ќе се занимава со непостоечки проблеми во Нова демократија, кои ги навредуваат не само членовите на партијата, туку и секој Грк во овие тешки времиња, нека знае дека автоматски ќе се најде надвор од партијата“, изјави строго Самарас.
|
