23.11.2011, 14:09 Европејците панично ги повлекуваат парите од банките
Депозитите на корпорациите се намалуваат и со двоцифрени проценти, а повлекувањето на средствата од приватните лица е нешто помало.
Брисел - Физичките и правните лица повлекле милијарди евра од депозитите во банките во проблематичните земји на еврозоната. Тоа може да го загрози банкарскиот сектор. Весникот „Волстрит журнал“ објави дека европските банки се соочиле со одлив на средства што ги повлекуваат клиентите, што го зајакнува притисокот врз банкарскиот сектор во регионот и им се заканува на финансиските компании да останат без клучен извор на финансирање.
Голем број италијански и шпански банки неодамна објавија намалување на средствата на депозитите на корпорациите и на другите институционални клиенти, со темпо кое се мери со двоцифрени проценти. Генералното темпо на повлекување на депозитите беше нешто помало, благодарение на послабото повлекување на средствата од приватните лица. Депозитната база на шпанските банки во третиот овогодишен квартал е намалена за 48 милијарди евра или за два отсто, се наведува во податоците на Шпанската централна банка.
Повлекувањето на средствата на клиентите се совпаѓа со повлекуквањето на заемите на банките од Европската централна банка, на рекордно ниво од почетокот на 2009 година. Финансиските институции во вторникот повлекоа 247 милијарди евра кредит од ЕЦБ во рок од една недела, што е повеќе од претходниот овогодишен максимум од 230,3 милијарди евра.
Банките во земјите како што се Шпанија, Португалија и Италија се обидуваат да ги задржат старите и да привлечат нови клиенти, нудејќи рекордно високи камати на депозитите, со што се зголемуваат цените на сопствените трансакции. Според Централната банка на Италија, просечната камата на депозитите во земјите во септември се зголеми на 2,6 отсто, што е безмалку двојно повеќе од каматата која се нудеше на почетокот на годината. Банките се принудени на атрактивна рекламна понуда со цел да привлечат депозитни средства.
Стравувањата за финансиската состојба на европските земји и банки се се' посилни, пристапот на банкарскиот сектор на пазарите на капиталот е се' потежок, при што голем број инвеститори не сакаат да ги кредитираат европските банки.
Експертите, меѓутоа, истакнуваат дека на банкарските депозити се' уште се наоѓаат милијарди евра, а освен тоа финансиските институции имаат можност да ги повлечат средствата од ЕЦБ со гаранција за државни обврзници и за друга актива.
Влошување на ситуацијата, сепак, може да го загрози банкарскиот сектор, напоменуваат експертите, оценувајќи дека наредната година европските банки мораат да ги исплатат обврзниците од околу 800 милијарди евра.
Доколку банките неможат да ги репрограмираат тие долгови или со пласман на обврзници или со привлекувањето на депозитни средства, ќе мораат да го намалат кредитирањето, што е негативен сигнал како за регулативните тела, така и за политичарите и инвеститорите. (Ек.Р.)
|
